İspaniyada tərk edilmiş A-Barka kəndi cəmi 0 avroya satışa çıxarılıb. Kənddə 12 yaşayış evi və 1,5 hektardan çox torpaq sahəsi var. Lakin simvolik qiymətə baxmayaraq, kəndə sahib olmaq istəyən şəxsi qarşıda milyonlarla avroluq öhdəlik gözləyir.

HİT.az xəbər verir ki, A-Barka ölkənin şimal-qərbində, Portuqaliya sərhədinin yaxınlığında yerləşir. Təklif ilk baxışdan Avropada mülk sahibi olmaq istəyənlər üçün olduqca cəlbedici görünsə də, kəndin yeni sahibindən ərazinin tamamilə bərpa edilməsi tələb olunur.

Yerli hakimiyyətin hesablamalarına görə, kəndin yenidən qurulması üçün 2-3 milyon avro vəsait lazım olacaq. Bu məbləğə yalnız 12 tərk edilmiş evin təmiri deyil, kəndin küçələrinin və əraziyə aparan yolların bərpası da daxildir.

Planın əsas məqsədi A-Barkanı turizm məkanına çevirməkdir. Kənddə istirahət və əyləncə obyektlərinin, kafe və restoranların yaradılması nəzərdə tutulur. Buna görə də təklif daha çox böyük sərmayə yatırmağa hazır olan sahibkarlar üçün nəzərdə tutulur.

Kəndin tarixinin bir neçə əsr əvvələ getdiyi bildirilir. A-Barka XV əsrdə Minyo çayının sahilində, Portuqaliya sərhədinin yaxınlığında salınıb və uzun müddət çaydan keçid məntəqəsi kimi istifadə olunub.

1920-ci illərdə kəndin yaxınlığında körpünün tikilməsi ilə sakinlərin həyat tərzi dəyişib. Əhali tədricən üzümçülüklə məşğul olmağa başlayıb. Lakin 1950-ci illərdə yaxınlıqda su anbarının tikilməsi vəziyyəti yenidən dəyişib. Bəndin istifadəyə verilməsi nəticəsində kəndin ətrafındakı kənd təsərrüfatı torpaqlarının bir hissəsi su altında qalıb.

Bundan sonra sakinlər A-Barkanı tədricən tərk edib və kənd zamanla tamamilə boşalıb. Hazırda yerli hakimiyyət tarixi yaşayış məntəqəsini yenidən canlandıracaq investor axtarır.

Beləliklə, kəndin özü üçün 0 avro tələb olunsa da, onu əldə edən şəxsin qarşısında milyonlarla avroluq bərpa və inkişaf layihəsi dayanır.

Samir