Yay aylarında evlərdə və ətraf ərazilərdə problemlər yaradan təkcə ağcaqanadlar deyil, həm də ev milçəkləridir. 

HİT.az xəbər verir ki, bu həşəratlar xüsusi təhlükə yaratmasa da, qida məhsullarını və ətraf mühiti çirkləndirərək gigiyena baxımından bir sıra problemlərə səbəb ola bilər. Onlar sürətlə çoxalır və 1,5–2 kilometr məsafəyə qədər uça bilir ki, bu da onların tamamilə məhv edilməsini çətinləşdirir.

Lakin “Zen Garden Oasis” YouTube kanalının eksperti bu narahatedici həşəratlardan qurtulmağa kömək edəcək effektiv vasitə təqdim edib. Resept olduqca sadədir, qarışığın hazırlanması üçün lazım olan məhsulları asanlıqla əldə etmək mümkündür. Bu barədə “agroforum.hu” yazır.

Hazırlanma üsulu

Qarışığın əsasını isti su təşkil edir. Suda 2 xörək qaşığı yumurta tozu həll etmək lazımdır, alternativ olaraq çiy yumurtadan da istifadə etmək olar. Daha sonra eyni miqdarda şəkər və 1 çay qaşığı maya əlavə edilir. Qarışığa bir qədər alma sirkəsi qatılır ki, bu da daha güclü qoxu yaradır.

Sonda qarışığa bir çay qaşığı maye sabun əlavə olunur. Bu, mayenin səthi gərilməsini pozur və milçəklərin onun üzərində qala bilməməsinə səbəb olur. İstəyə görə qarışığa balıq emulsiyası da əlavə etmək olar, bu isə qoxunun daha uzun müddət qalmasına kömək edir.

Bundan sonra qarışığı sadəcə bağda yerləşdirmək və nəticəni gözləmək qalır.

Bu qarışığın qoxusu insanlar üçün kifayət qədər xoşagəlməzdir, lakin məhz bu xüsusiyyət milçəkləri cəlb edir. Qarışığı qablara tökərək evdən və ya bağda tez-tez istifadə olunan yerlərdən (məsələn, manqal və ya terrasdan) təhlükəsiz məsafədə yerləşdirmək olar. Bundan əlavə, müxtəlif yerlərdə daha kiçik qablar qoymaqla təsiri artırmaq mümkündür.

Samir