Bir çox insan bu məşhur məhsulu mövsümdən kənar dövrdə təzə meyvələrə yaxşı və sağlam alternativ hesab edir. Lakin əslində onun tərkibində çox yüksək miqdarda şəkər gizlənir. Söhbət konservləşdirilmiş şaftalıdan gedir — bu məhsul tez-tez tortlara, kəsmikə və ya səhər sıyığına əlavə edilir, lakin onun əslində nə qədər “kalori bombası” olduğu çoxlarına məlum deyil. 

HİT.az xəbər verir ki, bu barədə sağlam qidalanma üzrə ekspert Katajina Bosaçka “Onet” portalına danışıb.

Ekspertin təhlilinə görə, standart bir qab konserv şaftalı təxminən 23 çay qaşığı şəkərə bərabərdir. Bu qədər yüksək şəkər miqdarı onun təbii şirədə deyil, qlükoza-fruktoza siropu və ya saxaroza məhlulunda saxlanılması ilə bağlıdır. Nəticədə, zahirən meyvə porsiyası kimi görünən məhsul əslində gündəlik şəkər normasını xeyli aşan yüksək kalorili qarışıqa çevrilir.

Ekspert bu məhsulun gündəlik rasiondan çıxarılmasını tövsiyə edən bir neçə səbəb göstərib. İlk növbədə, bu qədər şəkər qanda qlükozanın sürətli artımına səbəb olur və mədəaltı vəzini çox miqdarda insulin ifraz etməyə məcbur edir. Bu cür dalğalanmalar uzunmüddətli perspektivdə insulinə qarşı müqavimət, artıq çəki və 2-ci tip diabet riskini artırır.

Bundan əlavə, maye formada olan şəkər orqanizm tərəfindən daha tez mənimsənilir, bu da toxluq hissinin qısa müddətdə itməsi və əlavə qəlyanaltı istəyinin yaranması ilə nəticələnir.

Şərbətdə olan meyvələrin başqa bir mənfi tərəfi isə onların qida dəyərinin aşağı olmasıdır. Pasterizasiya və uzunmüddətli saxlanma nəticəsində şaftalı vitaminlərinin böyük hissəsini, xüsusilə C vitamini və B qrupu vitaminlərini itirir. Nəticədə məhsul əsasən “boş kalorilərdən” ibarət olur və faydalı maddələrdən kasad qalır.

Bundan başqa, meyvə turşusu ilə yüksək şəkər miqdarının birləşməsi diş çürüməsinə səbəb olan bakteriyalar üçün əlverişli mühit yaradır ki, bu da ağız sağlamlığı üçün risklidir.

Mütəxəssislər konserv şaftalı əvəzinə mövsümündə təzə, mövsümdən kənar isə dondurulmuş şaftalı seçməyi tövsiyə edirlər. Dondurma prosesi meyvənin qida dəyərini əlavə şəkərsiz daha yaxşı qoruyur.

Əgər konserv meyvə istifadə etmək zəruridirsə, dietoloqlar öz şirəsində olan variantlara üstünlük verməyi və istifadə etməzdən əvvəl meyvələri süzgəcdə yumağı məsləhət görürlər — bu, şərbətin bir hissəsini aradan qaldırmağa kömək edir.

Samir