Banan dondurulduqda onun tərkibindəki vitaminlər və lif dəyişməz qalır. Lakin təbii şəkərlər daha asan ayrıldığı üçün məhsul daha şirin hiss olunur. 

HİT.az Onet.pl portalına istinadən xəbər verir ki, nəticədə sadə, dadlı və faydalı desert əldə etmək mümkündür.

Nəşr izah edir ki, cəmi bir neçə saat dondurucuda qalan adi banan yalnız teksturasını deyil, dadını və insan orqanizminin ona reaksiyasını da dəyişir.

“Meyvə donduqda onun tərkibindəki su buz kristallarına çevrilir. Bu kristallar bananın sərt strukturuna cavabdeh olan incə hüceyrə divarlarını dağıdır. Dondurucudan çıxarıldıqdan və bir qədər əridildikdən sonra bananın iç hissəsi əvvəlki elastikliyini bərpa etmir — o, yumşaq, kremvari olur və dondurmanı xatırladır”, deyə məqalədə bildirilir.

Müəllif vurğulayır ki, belə bananın tərkibi dəyişmir — o, əvvəlki kimi vitamin və liflə zəngin qalır. Bununla belə, dadı və konsistensiyası fərqli olur: dondurulmuş banan daha tez parçalanır və tüpürcəklə daha sürətli qarışır ki, bu da dad hissinə təsir edir.

Nəşr bananları əvvəlcədən qabığını soyub hissələrə bölərək dondurmağı tövsiyə edir. Çünki dondurulduqdan sonra onlar çox sərt olur və bıçaqla doğramaq çətinləşir.

Məqalədə qeyd olunur ki, dondurulmuş bananda şəkərin miqdarı artmasa da, meyvə daha şirin dad verir. Bunun səbəbi aşağı temperatur və daha boş teksturanın təbii şəkərlərin — qlükoza, fruktoza və saxarozanın ağızda daha sürətli ayrılmasına imkan yaratmasıdır. Nəticədə dad reseptorları onları daha intensiv qəbul edir. Bundan əlavə, soyuq temperatur turşuluğun hiss edilməsini zəiflədir və şirinlik daha qabarıq hiss olunur.

Qeyd edilir ki, dondurulmuş banan toxluq hissinə də təsir göstərir. Bunun əsas səbəbi onun daha yavaş yeyilməsi və orqanizm tərəfindən fərqli emal olunmasıdır. Soyuq və sıx tekstura insanı parçaları ağızda daha uzun saxlamağa məcbur edir. Bu isə həzm sistemindən beyinə toxluq siqnallarının ötürülməsi üçün daha çox vaxt yaradır.

“Məhz buna görə bir çox insan dondurulmuş meyvələri təzə meyvələrlə müqayisədə daha yavaş yeyir və bu da adətən daha az porsiya ilə kifayətlənməyə səbəb olur. Aşağı temperatur müvəqqəti olaraq toxluq hissini gücləndirə bilər, lakin bu uzunmüddətli effekt deyil. Unutmaq olmaz ki, bananın tərkibi dəyişmir, buna görə toxluq əsasən porsiyanın ölçüsündən və ümumi qida qəbulundan asılıdır”, deyə məqalədə vurğulanır.

Nəşrdə bildirilir ki, dondurulduqdan sonra banandakı lif yox olmur, lakin onun strukturu və bağırsaqlardakı funksiyası dəyişir. Nişastanın bir hissəsi rezistent nişastaya çevrilir. Bu maddə nazik bağırsaqda həzm olunmur, yoğun bağırsağa keçərək bağırsaq bakteriyaları üçün qida rolunu oynayır. Bu isə toxluq hissinə və bağırsaqların fəaliyyətinə təsir göstərə bilər. Effekt bananın yetişmə dərəcəsindən və əridilmə üsulundan asılıdır.

“Əridildikdən sonra bananın iç hissəsi daha parçalanmış olur, buna görə lifin mexaniki təsiri azalır. Bununla belə, o yenə də qidanın bağırsaqlarda hərəkətinə kömək edir. Həssas həzm sistemi olan insanlar bananın bu formada istifadəsini daha yaxşı qəbul edirlər. Ancaq rezistent nişastanın çoxluğu köp yarada bilər. Buna görə də kiçik porsiyalarla başlamaq tövsiyə olunur”, deyə nəşr qeyd edir.

Məqalədə dondurulmuş bananı zülal və yağla zəngin məhsullarla — yoqurt, kəsmik və ya fıstıq yağı ilə birlikdə yemək məsləhət görülür. Bildirilir ki, belə kombinasiya şəkərin mənimsənilməsini ləngidir və daha sabit toxluq hissi yaradır.

“Həmçinin porsiyanın ölçüsünə diqqət edin: orta ölçülü bir bananda təxminən 90-120 kkal və kifayət qədər karbohidrat var. Xüsusilə onu krem və ya dondurma kimi istifadə etdikdə normanı aşmaq asandır. İstifadədən əvvəl bananı bir neçə dəqiqə dondurucudan çıxarmaq tövsiyə olunur ki, bir qədər yumşalsın və çeynəmək asan olsun”, deyə müəllif əlavə edib.

Samir