İnsanlar stressli vəziyyətdə yeməyə meyllidirlər, çünki kəskin vəziyyətlərdə adrenalin, xroniki stress zamanı isə kortizol ifraz olunur. Hər iki hormon yemək davranışına təsir göstərir: yüksək kalorili, yağlı və şəkərli qidalara olan istək artır. 

HİT.az xəbər verir ki, qidalanma üzrə mütəxəssis və aşpazı Karina Qazetdinova gazeta.ru-ya bildirib.

Mütəxəssisin sözlərinə görə, insanlar stress zamanı daha çox yemək istəmələrinin səbəbi orqanizmdə adrenalin və kortizol hormonlarının ifrazının artmasıdır. Bu hormonlar yüksək kalorili, yağlı və şirin qidalara meyli gücləndirir.

"Belə qidalar dopamin və serotonin kimi həzz hissi yaradan neyromediatorların ifrazını sürətlə artırır. Buna görə də ağır iş günündən sonra insanlar tərəvəz salatına deyil, pizza, şokolad və ya kartof friyə üstünlük verirlər", deyə Karina Qazetdinova bildirib.

Onun sözlərinə görə, stressi yeməklə aradan qaldırmağa çalışmaq yalnız qısamüddətli təsir göstərir. Bir neçə saat sonra enerji səviyyəsi yenidən azalır, günahkarlıq hissi və yorğunluq isə daha da artır.

Mütəxəssis xəbərdarlıq edib ki, stressin davamlı şəkildə "yeyilməsi" xroniki yorğunluğa, enerji səviyyəsində kəskin dəyişikliklərə, yuxu pozuntularına, narahatlığın artmasına, çəki artımına, insulin müqavimətinə, həzm problemlərinə, həmçinin şirin və yüksək dərəcədə emal olunmuş qidalara asılılığın formalaşmasına səbəb ola bilər.

Karina Qazetdinova vurğulayıb ki, qidalanma müəyyən dərəcədə stressin təsirlərini azalda bilər, lakin bunun üçün balanslı və tam dəyərli rasion vacibdir.

Onun sözlərinə görə, stressin tənzimlənməsində aşağıdakı qidalar mühüm rol oynayır:

* yağlı balıqlar (qızılbalıq, sardina, skumbriya və forel);
* maqneziumla zəngin məhsullar (ispanaq, qarabaşaq, balqabaq tumu, badam və avokado);
* fermentləşdirilmiş qidalar;
* mürəkkəb karbohidratlar;
* tünd şokolad;
* isti içkilər, xüsusilə bitki çayları.

Mütəxəssis qeyd edib ki, anti-stress qidalanma sağlam yuxunu, istirahəti və psixoloji dəstəyi əvəz etmir.

O, gün ərzində tətbiq oluna biləcək nümunəvi anti-stress menyusunu da təqdim edib. Səhər yeməyi üçün banan, qoz-fındıq və çia toxumu əlavə edilmiş yulaf sıyığı, yaşıl çay; ara qida kimi giləmeyvə ilə yunan yoqurtu və ya bir ovuc badamla tünd şokolad; naharda sobada bişmiş qızılbalıq, kinoa və tərəvəzlər və ya qarabaşaq, hinduşka əti və salat; günorta qəlyanaltısı üçün humus və tərəvəzlər və ya avokadolu tam taxıllı tost; axşam isə tərəvəz püresi şorbası və ya tofu ilə düyü və buğda bişmiş tərəvəzlər tövsiyə olunur.

Qazetdinova əlavə edib ki, ən böyük səhvlərdən biri qısa müddətdə "ideal sağlam qidalanma" rejiminə keçməyə çalışmaqdır. Onun fikrincə, daha səmərəli yanaşma kiçik, lakin davamlı vərdişlər formalaşdırmaqdır. Buraya yemək vaxtlarını buraxmamaq, sağlam qəlyanaltıları əl altında saxlamaq, hər yeməyə zülal və lif əlavə etmək, qidalanmanı əvvəlcədən planlaşdırmaq, yüksək dərəcədə emal olunmuş məhsulların istehlakını azaltmaq, kifayət qədər su içmək və tələsik və ya ekran qarşısında yeməkdən çəkinmək daxildir.

Samir