Kişilər nadir hallarda qidalanma ilə intim həyatın keyfiyyəti arasında əlaqə qururlar. Lakin ereksiya damarlarla bağlı prosesdir və damarların sağlamlığı qəbul edilən qidalardan asılıdır.
HİT.az xəbər verir ki, bu barədə uroloq Leonid Boxanov gazeta.ru-ya danışıb.
Ən çox qiymətləndirilməyən amillərdən biri alkoqol, xüsusilə də pivədir. Mayaotunda 8-prenilnaringenin adlı bitki fitoestrogeni var. Mütəmadi istifadə zamanı kişinin qanında estrogen səviyyəsi artır, “pivə qarnı” əmələ gəlir, süd vəziləri böyüyür və testosteronun səviyyəsi azalır.
“Həkimə 35-40 yaşdan sonra libidonun azalması şikayəti ilə müraciət edən pasiyentlərin anamnezində hər axşam 2-3 stəkan pivə içmək halları olur. 2-3 ay imtina etdikdən sonra testosteron dərmansız şəkildə əvvəlki səviyyəsinə qayıdır”, - deyə həkim bildirib.
Tünd alkoqollu içkilər də potensiyaya mənfi təsir göstərir. Spirt xayaların hüceyrələrini zədələyir və qan dövranını pozur. Gündə 150 ml-dən çox arağın bir neçə il ərzində qəbul edilməsi ereksiyanın zəifləməsinə səbəb ola bilər.
İkinci düşmən trans yağlar və fastfuddur. Marqarin, fri kartofu və burgerlərin tərkibində hidrogenləşdirilmiş yağlar olur. Onlar damarların daxili qatı olan endoteldə iltihab prosesini başladır. Nəticədə damarlar genişlənmək qabiliyyətini itirir. Halbuki ereksiya damarların kəskin şəkildə genişlənməsi ilə bağlıdır.
Üçüncü amil şəkər və sürətli karbohidratlardır. Şirin qazlı içkilər və un məmulatları insulin səviyyəsində kəskin artımlara səbəb olur. İnsulin müqaviməti cinsi hormonları birləşdirən qlobulinin ifrazını azaldır. Testosteron estradiola çevrilir. Nəticədə artıq çəki, aşağı testosteron səviyyəsi və zəif səhər ereksiyaları müşahidə olunur.
“Enerji içkiləri ayrıca problemdir. Kofein və taurin şəkərlə birlikdə arterial təzyiqin kəskin yüksəlməsinə və damarların daralmasına səbəb olur. 20-25 yaşlı pasiyentlərdə bu yaşda olmamalı olan erektil disfunksiya halları görürük”, - deyə uroloq xəbərdarlıq edib.
Həddindən artıq soya da risk yarada bilər. Soya fitoestrogenlər ehtiva edir. Orta miqdarda, həftədə 1-2 dəfə qəbul edilməsi təhlükəsiz hesab olunur. Lakin gündəlik olaraq soya əsaslı protein kokteylləri, tofu və soya südünün istifadəsi bəzi insanlarda libidonun azalmasına səbəb ola bilər.
Kolbasa və hisə verilmiş məhsullarda isə duz və nitritlər əsas problem hesab olunur. Duz arterial təzyiqi artırır, xroniki hipertoniya isə ereksiyanın keyfiyyətini aşağı salır.
Balqabaq tumu, mal əti və istridyədə olan sink testosteronun sintezi üçün vacibdir. Yağlı balıqlardakı omeqa-3 yağ turşuları damarların elastikliyinin qorunmasına kömək edir. Tərəvəz və göyərtidəki nitratlar isə ereksiya zamanı əsas siqnal rolunu oynayan azot oksidinə çevrilir. Qoz-fındıq, avokado və zeytun yağı hormonal balansın qorunmasına kömək edir.
“30 yaşdan yuxarı kişilər üçün pivə həftədə bir dəfədən çox və 0,5 litrdən artıq olmamalıdır. Fastfud iki həftədə bir dəfədən çox qəbul edilməməli, şəkər nəzarətdə saxlanılmalı, boşqabda isə balıq, qoz-fındıq, tərəvəz və göyərti olmalıdır. 3-4 aydan sonra pasiyent özü fərqi hiss edir”, - deyə həkim yekunlaşdırıb.
Samir
