Ciddi aşağı karbohidratlı pəhrizlə arıqladıqdan sonra əvvəlki miqdarda karbohidrat qəbuluna qayıtmaq orqanizmə istifadə olunan karbohidratın növündən asılı olaraq fərqli təsir göstərir. Nişastalı qidalar iltihabi prosesləri başladır, əlavə edilmiş şəkər isə müəlliflərin gözləntilərinin əksinə olaraq ən zəif immun reaksiyaya səbəb olub. 

HİT.az xəbər verir ki, araşdırmanın nəticələri “Cell Press Blue” jurnalında dərc olunub.

“NYU Langone Health” tibb mərkəzinin alimləri 18-50 yaş aralığında olan, artıq çəkili, lakin diabet və ürək-damar xəstəlikləri olmayan insanları müşahidə ediblər. Əvvəlcə iştirakçılar çox aşağı karbohidratlı pəhriz saxlayaraq bədən çəkilərinin təxminən 15 faizini itiriblər. Daha sonra 10 həftə ərzində karbohidratların ümumi kalorinin təxminən 57 faizini təşkil etdiyi qidalanmaya qayıdıblar.

Bir qrupa karbohidratlar təmizlənmiş dənli bitkilərdən alınan nişasta, digər qrupa isə şəkər formasında verilib. Məhz nişastalı qidalanma iltihab göstəricilərinin artmasına səbəb olub: adipsin zülalının səviyyəsi yüksəlib, CD4 limfositləri və neytrofillər aktivləşib. Şəkər qəbul edən qrupda isə immun aktivləşmə ən zəif səviyyədə olub. Bununla belə, tədqiqatçılar xüsusi olaraq vurğulayıblar ki, bu nəticə şəkərin sağlamlıq üçün faydalı olduğu anlamına gəlmir.

Müəlliflərin fikrincə, nişasta ilə zəngin qidalar aşağı karbohidratlı pəhrizdən sonra arıqlama dövründə iltihabın kifayət qədər qiymətləndirilməyən amili ola bilər. Bunun səbəbi, ehtimal ki, yeməkdən sonra qanda qlükozanın kəskin yüksəlməsidir.

Tədqiqat kiçikmiqyaslı olub: qan analizləri üçün cəmi 40-a yaxın insanın məlumatlarından istifadə edilib. Buna görə də nəticələrin daha geniş iştirakçı qrupları üzərində yoxlanılmasına ehtiyac var. Bununla belə, araşdırma göstərir ki, qidalanmada yalnız karbohidratların miqdarı deyil, onların mənbəyi də əhəmiyyətlidir.

Tədqiqatçılar vurğulayırlar ki, söhbət karbohidratların özlərinin zərərindən deyil, rafinə edilmiş nişasta ilə tam məhsullar arasındakı fərqdən gedir. Təmizlənmiş dənli bitkilər qanda şəkərin ən kəskin yüksəlməsinə səbəb olur.

Ciddi aşağı karbohidratlı pəhrizdən çıxan insanlara karbohidratları tədricən rasiona qaytarmaq, ağ çörək, şirniyyat və ağ düyü əvəzinə tam taxıllı məhsullara, tərəvəzlərə və paxlalılara üstünlük vermək tövsiyə olunur.

Samir