Turşu xiyar aşağı kalorili olduğu üçün arıqlamaq istəyənlərin menyusunda tez-tez yer alır. Lakin bu məhsulun tərkibindəki yüksək duz miqdarı səbəbindən ondan həddindən artıq istifadə etmək tövsiyə edilmir.

HİT.az xəbər verir ki, “Health” nəşri turşu xiyarın çəkiyə təsiri və pəhriz zamanı istifadəsi ilə bağlı məlumatları dərc edib.

Xiyar əsasən sudan ibarət olduğuna görə kalorisi azdır. Hazırlanma üsulundan asılı olaraq bir turşu xiyarın tərkibində təxminən 6-20 kilokalori ola bilər. Bu isə onu yüksək kalorili qəlyanaltılara alternativ edir.

Turşunun faydası onun necə hazırlandığından da asılıdır. Sirkə ilə hazırlanan turşu xiyarla fermentasiya yolu ilə hazırlanan məhsul eyni xüsusiyyətlərə malik deyil. Fermentasiya edilmiş xiyarlarda bağırsaq mikroflorasına müsbət təsir göstərə bilən canlı faydalı bakteriyalar ola bilər. Lakin onların birbaşa arıqlamağa səbəb olduğunu təsdiqləyən kifayət qədər sübut yoxdur.

Turşu xiyarda karbohidrat da çox azdır – adətən bir porsiyada 1 qramdan aşağı olur. Yağ və zülalın miqdarı isə olduqca azdır. Buna görə məhsul aşağı karbohidratlı qidalanmaya üstünlük verənlər üçün uyğun qəlyanaltı sayıla bilər.

Turşu xiyarın əsas mənfi tərəfi yüksək natrium tərkibidir. Bir ədəd turşuda təxminən 330 milliqram natrium ola bilər. Həddindən artıq natrium orqanizmdə mayenin saxlanmasına və arterial təzyiqin yüksəlməsinə səbəb ola bilər.

Bundan başqa, bütün turşu xiyarlarda probiotiklər olmur. Sirkə ilə hazırlanan və ya pasterizə edilən məhsullarda canlı faydalı bakteriyalar olmaya bilər.

Turşu xiyar həmçinin təzə tərəvəzlərlə müqayisədə daha az qida maddəsi ehtiva edir. Tərkibində K vitamini olsa da, lif, vitamin və mineral baxımından bir çox təzə tərəvəzdən geri qalır. Çox miqdarda qəbul edildikdə bəzi insanlarda köp və qarında narahatlıq da yarada bilər.

Mütəxəssislər arıqlama dövründə turşu xiyar seçərkən daha az natriumlu məhsullara üstünlük verməyi məsləhət görürlər. Onu çips, kreker və digər yüksək kalorili qəlyanaltıların əvəzinə istifadə etmək mümkündür. Daha balanslı qidalanma üçün isə turşunu zülal, lif və faydalı yağ mənbələri ilə birlikdə qəbul etmək daha məqsədəuyğundur.

Beləliklə, turşu xiyar arıqlama zamanı menyudan tamamilə çıxarılmalı məhsul deyil. Onun əsas üstünlüyü aşağı kalorili olmasıdır. Lakin turşu xiyarın özü arıqlamağa səbəb olmur və yüksək duz tərkibinə görə ölçülü şəkildə istehlak edilməlidir.

Samir