Darçın əlavə edilmiş yaşıl çay son vaxtlar qan şəkərinə nəzarət etdiyi iddiası ilə məşhurlaşıb. Lakin mütəxəssislər bu içkinin möcüzəvi təsirə malik olmadığını və bəzi insanların ondan istifadə zamanı ehtiyatlı davranmalı olduğunu bildirirlər.

HİT.az xəbər verir ki, “Verywell Health” nəşrinin məlumatına görə, yaşıl çayın tərkibində orqanizmin şəkəri emal etməsinə kömək edə biləcək maddələr var. Dietoloq Sara Alsinqin sözlərinə görə, bəzi araşdırmalarda yaşıl çayın acqarına qan şəkərinin səviyyəsini cüzi şəkildə azalda biləcəyi göstərilib. Ancaq bu tədqiqatların əksəriyyətində adi dəmlənmiş çay deyil, yaşıl çay ekstraktı araşdırılıb.

Darçınla bağlı nəticələr də tam birmənalı deyil. Bu ədviyyatın insulinə həssaslığı yaxşılaşdırmağa və qlükozanın hüceyrələr tərəfindən mənimsənilməsinə kömək edə biləcəyi ehtimal edilir. Lakin araşdırmaların böyük hissəsi diabetli insanlar üzərində aparılıb və sağlam insanlarda nəticələr fərqli olub.

Dietoloq Kassandra Padula Berk qeyd edir ki, yaşıl çay və darçının birlikdə qəbulunun ayrıca istifadədən daha güclü təsir göstərdiyini təsdiqləyən kifayət qədər sübut yoxdur. Üstəlik, bir fincan çaya əlavə edilən az miqdarda darçının qan şəkərini nəzərəçarpacaq dərəcədə aşağı salacağı gözlənilmir.

Həm yaşıl çay, həm də darçın antioksidantlarla zəngindir. Dietoloq Loren Manakerin sözlərinə görə, bu maddələr hüceyrələrin qorunmasına və iltihabi proseslərin azalmasına kömək edə bilər. Darçının qan yağlarına və arterial təzyiqə mümkün təsiri də araşdırılır.

Bununla belə, mütəxəssislər içkini müalicə vasitəsi kimi qəbul etməməyi tövsiyə edirlər. Onun əsas üstünlüklərindən biri şəkərli içkilərin əvəzinə istifadə olunmasıdır. Şəkər və qaymaq əlavə edilmiş qəhvə əvəzinə şəkərsiz yaşıl çay içmək daha sağlam seçim ola bilər.

Darçınlı yaşıl çay xüsusilə aşağıdakı insanlar üçün uyğun olmaya bilər:

* kofeinə həssas olanlar;
* mədə yanması və reflüks problemi yaşayanlar;
* kofeinin narahatlıq hissini artırdığı şəxslər;
* insulin və ya diabet əleyhinə dərman qəbul edənlər.

Yaşıl çayın tərkibində kofein olduğundan, ona həssas insanlar ürəkdöyünmə və digər xoşagəlməz hallar yaşaya bilər. Bu səbəbdən içkini gec saatlarda qəbul etmək də məsləhət görülmür.

Darçının növünə də diqqət etmək lazımdır. Mağazalarda daha çox satılan kassiya darçınının tərkibində kumarin adlı maddə var. Onun böyük miqdarda və uzun müddət istifadəsi qaraciyərə zərər verə bilər. Seylon darçınında isə kumarin daha azdır və tez-tez istifadə üçün daha təhlükəsiz hesab olunur.

Bundan başqa, böyük miqdarda darçın və xüsusilə qida əlavələri formasında istifadəsi qan şəkərinin həddindən artıq aşağı düşməsinə səbəb ola bilər. Diabet dərmanı qəbul edən şəxslərin bu məsələdə xüsusilə diqqətli olması tövsiyə edilir.

Samir