Dünyanın ən zəhərli heyvanı ilə bağlı müxtəlif mənbələr fərqli cavablar təqdim edir. Lakin bəzi tədqiqatçılara görə, bu kiçik dəniz canlısı - coğrafi konus (Conus geographus) adlı konus ilbizidir.

HİT.az xəbər verir ki, qutu meduzaları (Chironex fleckeri) dünyanın ən zəhərli dəniz heyvanları kimi tanınır. Lakin konus ilbizi bəzi tədqiqatçılar tərəfindən dünyanın ən ölümcül zəhərinə sahib canlı hesab edilir. Bu kiçik və zərərsiz görünən canlı, "Death Stalker" əqrəbinin zəhərinin yalnız 1/10 hissəsi qədər zəhərlə belə ovunu öldürə bilir.

Hind-Sakit okeanı bölgəsində mərcan riflərində yaşayan bu canlılar əsasən balıqları ovlayır və insanlarla nadir hallarda qarşılaşır. Lakin indiyədək bu ovçuya aid təxminən 30 dalğıc ölümü qeydə alınıb.

Bir konus ilbizinin zəhəri təxminən 700 insanı öldürmək gücündədir. Hazırda bu güclü zəhərin müalicəsi yoxdur. Zəhərlənən insan yalnız zəhər bədəndən çıxana qədər sağ qalmağa çalışmalıdır.

Konus ilbizi ovuna zıpkınabənzər bir dişlə sancır və zəhər qarışığı dərhal təsir göstərir. Bu qarışıq yüzlərlə müxtəlif toksindən ibarətdir və onun bəzi komponentləri morfindən 10.000 dəfə güclü təsir göstərir. Sancdığı canlı dərhal iflic olur və hərəkətsiz qalır.

Elm adamları bu güclü ağrıkəsici təsirə malik maddələrin tibbdə istifadə edilə biləcəyini araşdırırlar. Əgər uğurlu nəticələr əldə olunsa, konus ilbizinin zəhəri gələcəkdə bəzi xəstəliklərin müalicəsində istifadə edilə bilər.

Samir