1874-cü ildə afroamerikalı ixtiraçı Lyuis Hovard Latimer qatarlar üçün təkmilləşdirilmiş tualet sistemi hazırlayıb. 

HİT.az xəbər verir ki, "The Economic Times"ın yazdığına görə, onun yaratdığı həll qatar səfərlərini daha təhlükəsiz və gigiyenik edib.

Məlumata əsasən, Latimer Çarlz U. Braun ilə birlikdə "dəmir yolu vaqonları üçün unitaz" patentini alıb. Onların hazırladığı konstruksiya tualetin dəliyindən vaqona tozun, küləyin və müxtəlif çirklərin daxil olmasının qarşısını alırdı.

Nəşr qeyd edir ki, bu ixtira Latimerin elektrik işıqlandırması sahəsində qazandığı məşhurluqdan əvvəlki mühüm nailiyyətlərindən biri olub. Onun işi bu gün də ABŞ-da innovasiya tarixinin bir hissəsi hesab olunur.

Həmin dövrdə dəmir yolu şəbəkəsi ABŞ boyunca sürətlə genişlənir, qatarla səyahət isə getdikcə daha geniş yayılırdı. Buna görə də sərnişinlərin rahatlığı və sanitariya şəraiti mühüm məsələlərdən biri idi.

Latimer və Braunun hazırladığı sistemdə tualetin alt hissəsi fırlanan mexanizmlə təchiz edilmişdi. Oturacağın qapağı açıldıqda bu hissə avtomatik bağlanır, beləliklə tozun və küləyin vaqona daxil olmasına mane olurdu.

Sadə mexaniki həll sayəsində qatar tualetləri daha praktik hala gəlib və sərnişinlərin üzləşdiyi bir sıra problemlərin aradan qaldırılmasına kömək edib.

Samir