ABŞ-ın "Gulfstream Aerospace" şirkəti "G700" biznes təyyarəsinin Los-Anceles (ABŞ) – Farnboro (Böyük Britaniya) marşrutu üzrə yeni sürət rekordu müəyyənləşdirdiyini açıqlayıb.
HİT.az xəbər verir ki, bu barədə şirkətin rəsmi saytında məlumat verilib.
Məlumata görə, "Gulfstream G700" 8 778 kilometrlik məsafəni 8 saat 27 dəqiqəyə qət edərək marşrut üzrə əvvəlki rekordu yeniləyib.
Beləliklə, "G700" Kanada şirkəti "Bombardier"in istehsal etdiyi "Global 8000" modelinin nəticəsini 19 dəqiqə yaxşılaşdırıb. Əvvəlki rekord cəmi bir neçə həftə əvvəl qeydə alınmışdı. Həmin vaxt "Global 8000" eyni marşrutu 8 saat 46 dəqiqəyə başa vurmuşdu.
"Bombardier" uçuşun əlverişsiz külək şəraitində həyata keçirildiyini bildirsə də, "Gulfstream" rekord uçuş zamanı hava şəraiti ilə bağlı məlumat açıqlamayıb.
Rəsmi göstəricilərə əsasən, "Global 8000" daha yüksək maksimal sürətə malikdir. Onun maksimal sürəti Mach 0,95 (təxminən 1 010 km/saat), "G700"ün maksimal sürəti isə Mach 0,935 (təxminən 990 km/saat) təşkil edir. Buna baxmayaraq, praktik uçuş zamanı "Gulfstream G700" sözügedən marşrutda daha sürətli nəticə göstərib.
Hər iki təyyarə uzun uçuş məsafəsi ilə də seçilir. "G700" bir yanacaq doldurulması ilə 7 750 dəniz mili (təxminən 14 350 kilometr), "Global 8000" isə təxminən 14 800 kilometr məsafə qət edə bilir.
Ekspertlərin fikrincə, biznes-jet istehsalçıları arasında sürət rekordları uğrunda rəqabət getdikcə daha da güclənir və yaxın gələcəkdə yeni rekordların qeydə alınacağı istisna edilmir.
Bundan əlavə, Qərb ölkələrində yeni nəsil səsdən sürətli sərnişin təyyarələrinin hazırlanması istiqamətində işlər davam edir. Bu layihələrdən biri NASA və "Lockheed Martin Skunk Works" tərəfindən hazırlanan eksperimental "X-59 QueSST" təyyarəsidir. Bildirilir ki, o, bu yaxınlarda ilk dəfə səs səddini keçərək gələcəyin kommersiya aviasiyası üçün nəzərdə tutulan texnologiyaların perspektivini nümayiş etdirib.
Ötən il isə ABŞ-ın "Boom Technology" şirkətinin hazırladığı eksperimental "XB-1" təyyarəsi son sınaq uçuşunu həyata keçirib. Sınaqların başa çatdırılması şirkətə tammiqyaslı səsdən sürətli sərnişin təyyarəsinin prototipinin hazırlanmasının növbəti mərhələsinə keçməyə imkan verib.
Samir
