İtaliyanın Sardiniya muxtar bölgəsi kiçik şəhər və kəndlərdə əhalinin azalmasının qarşısını almaq məqsədilə dəstək proqramını 2026-cı il üçün də uzadıb. Proqram çərçivəsində adaya köçərək ilk evini alan və ya təmir edən şəxslərə 15 min avroyadək qrant ayrılır.
HİT.az xəbər verir ki, bu barədə "Meglepetés" portalı məlumat yayıb.
Rəsmi məlumata əsasən, proqram 5 min nəfərədək əhalisi olan yaşayış məntəqələrini əhatə edir. Əvvəllər isə yalnız daha az əhalisi olan qəsəbələr bu təşəbbüsdən yararlana bilirdi.
Layihənin məqsədi son onilliklər ərzində əhalisinin böyük hissəsini itirmiş icmaların yenidən canlandırılmasıdır.
Kimlər müraciət edə bilər?
Proqram yalnız Sardiniya və ya İtaliya sakinləri üçün nəzərdə tutulmayıb. Qaydalar xarici ölkələrdən və ya İtaliyanın digər bölgələrindən Sardiniyanın kiçik yaşayış məntəqələrinə köçmək istəyən şəxslərin də müraciət etməsinə imkan verir.
Bununla belə, qrant avtomatik şəkildə verilmir. Müraciət edən şəxslər rəsmi yaşayış ünvanını həmin ərazidə qeydiyyata almalı, bələdiyyənin tələblərini yerinə yetirməli və uzunmüddətli yaşamaq öhdəliyi götürməlidirlər.
Qrant nəyə xərclənə bilər?
Maliyyə dəstəyi sadəcə köçməyə görə ödənilmir. Vəsait yalnız ilk yaşayış evinin alınmasına, təmirinə və ya bərpasına sərf oluna bilər.
Qrant çəkilən xərclərin 50 faizini qarşılayır, lakin maksimum məbləğ 15 min avrodur.
Bu səbəbdən proqram yalnız Sardiniyada daimi məskunlaşmaq, ev və ya mənzil almaq və onu əsas yaşayış yeri kimi istifadə etmək istəyən şəxslərə şamil edilir.
Əsas şərtlər
Qrant alan şəxs aldığı və ya təmir etdirdiyi daşınmaz əmlakı ailəsinin əsas yaşayış yeri kimi istifadə etməlidir.
Bundan əlavə, proqram çərçivəsində son ödənişi aldıqdan sonra ən azı beş il ərzində yaşayış yerini dəyişmək və ya həmin evi tərk etmək olmaz.
Kimlərə üstünlük veriləcək?
2026–2028-ci illərdə proqramın maliyyələşdirilməsi üçün hər il 15 milyon avro ayrılması nəzərdə tutulur.
Yerli KİV-in məlumatına görə, seçim zamanı aşağıdakı kateqoriyalara üstünlük verilə bilər:
* xarici ölkələrdən və ya İtaliyanın digər bölgələrindən köçənlər;
* gənc ailələr;
* uşaqlı ailələr;
* yaşı 40-dan aşağı olan müraciətçilər.
Qrant hansı yaşayış məntəqələrində tətbiq olunur?
Dəstək proqramı əhalisi 5 min nəfərdən az olan müxtəlif yaşayış məntəqələrini əhatə edir.
Artıq müraciət qəbul edən bələdiyyələr arasında Pattada, Budjerru, Ales, Ruinas və Simaksis yer alır. Bu yaşayış məntəqələrinin əksəriyyəti adanın daxili hissəsində yerləşir və burada mənzil qiymətləri məşhur dəniz kurortları ilə müqayisədə xeyli aşağıdır.
Müraciət qaydası
Proqram üzrə vahid müraciət sistemi yoxdur. Maliyyələşdirmə regional hökumət tərəfindən təmin edilsə də, müsabiqələri ayrı-ayrı bələdiyyələr keçirir.
Hər bələdiyyə müraciət müddətlərini, tələb olunan sənədləri və əlavə seçim meyarlarını müstəqil müəyyənləşdirir. Buna görə də şərtlər yaşayış məntəqəsindən asılı olaraq fərqlənə bilər.
Sardiniya rəhbərliyi vurğulayır ki, proqram turistlər və ya investorlar üçün deyil, adada uzunmüddətli yaşamaq və kiçik icmaların yenidən inkişafına töhfə vermək istəyən şəxslər üçün nəzərdə tutulub.
Samir
