ABŞ-ın hər bir ştatında insanlar üçün ən böyük təhlükə yaradan heyvanlar müəyyənləşdirilib. 

HİT.az xəbər verir ki, "World Population Review" platformasının 2026-cı il məlumatlarına əsaslanan araşdırmasının nəticələrini "Fox News" yayımlayıb.

Siyahıya ayı və sığın kimi iri məməlilərlə yanaşı, itlər, zəhərli ilanlar, meduzayabənzər dəniz orqanizmləri və digər canlılar da daxil edilib.

İlanlar ən geniş yayılmış təhlükə hesab olunur

Araşdırmaya görə, ABŞ-da ən çox ştatda təhlükəli heyvan kimi müxtəlif növ ilanlar göstərilib.

Corciya ştatında sakinlərə cırtdan çıngırdaqlı ilandan ehtiyatlı olmaq tövsiyə olunur. Oklahomada isə qərb cırtdan çıngırdaqlı ilan ən təhlükəli növ hesab edilir.

Konnektikut və Kanzas ştatlarında meşə çıngırdaqlı ilanı ilk yerdə qərarlaşıb. Kaliforniyada cənub Sakit okean çıngırdaqlı ilanı, Arizonada isə qərb almaz naxışlı çıngırdaqlı ilan əsas təhlükə sayılır.

Bundan başqa, Şimali Dakotada çöl çıngırdaqlı ilanı, Nevadada Mojave çıngırdaqlı ilanı, Miçiqanda isə şərq massasauqa ilanı ən təhlükəli növlər sırasında göstərilib.

Digər zəhərli ilanlar da siyahıda yer alıb. Luizianada şərq almaz naxışlı çıngırdaqlı ilan, Missisipidə isə pambıqağız su ilanı (cottonmouth) əsas təhlükə hesab olunur.

İndianada şərq misbaş ilanı, Cənubi Karolinada cənub misbaş ilanı, Havayda isə sarıqarnlı dəniz ilanı ən təhlükəli növlər kimi qeyd edilib.

Həşəratlar və hörümçəkkimilər də risk yaradır

Bəzi ştatlarda əsas təhlükə zəhərli həşəratlar və digər buğumayaqlılardan gəlir.

Ayovada arılar, Missuridə gənələr, Nyu-Yorkda ağcaqanadlar, Alabama və Nebraskada isə "qara dul" hörümçəyi insanlar üçün ən təhlükəli canlılar hesab olunur.

Sahil ştatlarında dəniz canlıları ön plandadır

Araşdırmada bəzi sahil ştatlarında dəniz canlıları əsas təhlükə mənbəyi kimi göstərilib.

Rod-Aylenddə pələng köpəkbalığı, Merilend və Virciniyada isə öküz köpəkbalığı siyahıya başçılıq edir.

Delaver və Şimali Karolinada ən təhlükəli canlı "Portuqaliya gəmisi" adlanan meduzayabənzər dəniz orqanizmidir. Mütəxəssislər bildirirlər ki, onun zəhəri nadir hallarda ölümcül olsa da, ciddi yanıqlara, ağrılı qabarcıqlara və dəri qıcıqlanmasına səbəb ola bilər.

Florida və Texas ştatlarında isə Amerika timsahı əsas təhlükə mənbəyi hesab edilir.

İri məməlilər də siyahıdadır

Tennessi və Viskonsində qara ayılar, Oreqonda Şimali Amerika qara ayısı, Kentukki və Massaçusetsdə isə Amerika qara ayısı ən təhlükəli heyvan kimi göstərilib.

Nyu-Meksikoda puma, Kolorado, Men, Nyu-Hempşir və Vermontda isə sığınlarla bağlı risklərin daha yüksək olduğu qeyd olunub.

Aydaho, Montana və Vaşinqton ştatlarında qrizli ayıları, Cənubi Dakota və Vayominqdə isə bizonlar siyahıya başçılıq edir.

Arkanzas, Ohayo, Qərbi Virciniya və Pensilvaniyada ağquyruq maralları ən təhlükəli heyvanlar kimi qiymətləndirilib.

Gözlənilməz liderlər

Alyaskada əsas təhlükə mənbəyi ev heyvanı sayılsa da, itlər hesab olunur.

İllinoys, Minnesota, Nyu-Cersi və Yuta ştatlarında isə koyotlar ən təhlükəli heyvanlar siyahısında ilk yeri tutur.

Araşdırmanın nəticələrinə görə, ilanlar ümumilikdə 14 ştatda ən təhlükəli heyvan kimi qeydə alınıb. Ayılar səkkiz, marallar və digər iri dırnaqlı heyvanlar 10, itlər və koyotlar beş, sancan və dişləyən buğumayaqlılar isə daha beş ştatda əsas təhlükə mənbəyi hesab olunur. Sahil və dəniz canlıları ilə bağlı risklər də beş ştatda ilk sırada yer alıb.

Samir