1965-ci ildə britaniyalı bacılar Rozelin “Babs” Atkins və Evelin “Etti” Atkins çoxdankı arzularını gerçəkləşdirərək Kornuoll sahillərində kiçik bir ada alıblar. Bunun üçün 30 min dollar ödəyiblər. Sonradan onlar şəxsi mülklərini bu gün də mövcud olan təbiət qoruğuna çeviriblər. 

HİT.az xəbər verir ki, bu barədə “The Times of India” yazıb.

Söhbət Lu adasından, digər adı ilə Müqəddəs Corc adasından gedir. Adanın sahəsi təxminən 9 hektardır, ən yüksək nöqtəsi isə dəniz səviyyəsindən 47 metr yüksəklikdə yerləşir. Ada materikdəki Lu şəhərindən təxminən 1,6 kilometr aralıdadır.

Adanı satın alanda Evelinin təxminən 50 yaşı var idi. O, burada məskunlaşaraq nərgiz yetişdirməyə başlayıb. Həmin vaxt Rozelin hələ materikdə işləyirdi. Buna görə də ilk 11 il ərzində adaya əsasən həftəsonları və məzuniyyət günlərində gedirdi.

1976-cı ildə təqaüdə çıxdıqdan sonra Rozelin bacısının yanına tamamilə köçüb. Bacılar birlikdə adada təxminən 40 il yaşayıblar. Evelin bu qeyri-adi həyat təcrübəsindən “Biz ada aldıq” və “Kornuol adımızdan hekayələr” kitablarında bəhs edib.

Adanın daha qədim tarixi də var. Burada erkən xristian məskəni və orta əsrlərə aid ibadətgah olub. Arxeoloji tapıntılar adada insanların əsrlər boyu yaşadığını göstərir. Sonrakı dövrlərdə isə ada qaçaqmalçılıqla əlaqələndirilib.

İllər keçdikcə Lu demək olar ki, toxunulmaz vəziyyətdə qalıb. Bacılar torpaqlarını böyük turizm obyektinə çevirmək istəməyib və təbiətin qorunmasına üstünlük veriblər.

1997-ci ildə Evelinin ölümündən sonra Rozelin adada tək yaşamağa davam edib. O, hələ sağlığında ölümündən sonra adanı Kornuoll Vəhşi Təbiətin Mühafizəsi Fonduna bağışlamaq qərarına gəlib.

Rozelin 2004-cü ildə vəfat edib. Bundan sonra təşkilat adanı öz idarəçiliyinə götürüb. Həmin vaxtdan Lu təbiət qoruğu statusuna malikdir və ərazi intensiv tikintidən qorunur.

Bu gün Lu dəniz təbiət qoruğudur. Burada meşəlik ərazilər, sahilyanı çəmənliklər, qayalı sahillər və dəniz ekosistemləri bir arada mövcuddur.

Ada quşlar üçün də mühüm yaşayış məkanıdır. Burada qarabatatlar, sule quşları və sağsağanquşlar yuva qurur. Ətraf sulardan boz suitilər istifadə edir. Bundan başqa, adada Kornuolldakı ən böyük qaraqanadlı qağayı koloniyalarından biri yerləşir.

Kornuoll Vəhşi Təbiətin Mühafizəsi Fondu burada sahilyanı ekosistemin uzunmüddətli tədqiqatlarını aparır. Mütəxəssislər xüsusilə növ tərkibindəki dəyişiklikləri, invaziv növlərin yayılmasını və iqlim dəyişikliklərinin təsirini izləyirlər.

Samir