Qara dəniz regionunda liman və nəqliyyat infrastrukturuna hücumların artması dünya taxıl bazarında narahatlığı gücləndirib.
HİT.az xəbər verir ki, “Bloomberg”in məlumatına görə, Ukrayna və Rusiyadan taxıl tədarükündə yaranan problemlər Asiyanın əsas idxalçılarını alternativ mənbələr axtarmağa vadar edir.
Məlumata görə, avqustun ilk yarısında Ukraynanın taxıl ixracı ötən ilin eyni dövrü ilə müqayisədə 75 faiz azalıb. Rusiyanın bu aykı tədarükünün isə son beş ilin orta göstəricisinin yarısından da aşağı olacağı gözlənilir.
Qara dəniz regionu dünya taxıl və günəbaxan yağı tədarükünün əsas mərkəzlərindən biridir. Ukrayna və Rusiya birlikdə dünya buğda ixracının dörddə birindən çoxunu təmin edir. Buna görə də bölgədəki logistika problemlərinin qlobal bazara təsiri getdikcə daha çox hiss olunur.
İndoneziya – dünyanın ikinci ən böyük buğda idxalçısı və Ukrayna taxılının əsas alıcılarından biri – sentyabr və oktyabr ayları üçün Avstraliyadan buğda partiyaları alıb. Cənub-Şərqi Asiyanın digər ölkələri də Avstraliya buğdasına maraq göstərir.
Banqladeş isə tədarük üçün Rumıniyaya üz tutub. Şimali Amerika ölkələrindən də taxıl tədarükü ilə bağlı sorğuların daxil olduğu bildirilir.
Hindistan isə Qara dənizdən günəbaxan yağı tədarükündə yaranan gecikmələri kompensasiya etmək üçün palma, soya və raps yağlarına yönəlir. Ölkə Baltikyanı ölkələr və Argentinadan da bitki yağı almağa başlayıb.
Analitiklər hesab edir ki, böhran uzun sürərsə, buğdanın qiymətinin artması riski yüksəkdir. Çikaqo Birjasında buğda fyuçersləri iyunun sonundan etibarən təxminən 15 faiz bahalaşıb.
Bölgədəki vəziyyəti daha da mürəkkəbləşdirən amillərdən biri Rusiyanın Novorossiysk limanındakı iri taxıl terminallarının fəaliyyətində yaranan problemlərdir. Ukraynanın dron hücumundan sonra üç böyük terminalın işini dayandırdığı bildirilir.
Eyni zamanda, avqust ayında Ukraynanın Böyük Odessa limanlarına heç bir gəminin daxil olmadığı qeyd olunur. Ekspertlər Qara dənizdəki problemlərin yalnız dəniz yolu ilə deyil, Ukraynanın quru üzərindən həyata keçirdiyi aqrar ixracına da təsir göstərə biləcəyini bildirirlər.
Beləliklə, dünyanın əsas taxıl alıcıları Qara dənizdən tədarükün bərpasını gözləmək əvəzinə Avstraliya, Rumıniya, Argentina və Şimali Amerika kimi alternativ mənbələrə yönəlməyə başlayıb.
Samir
