Bəzi insanlar supermarketə gedərkən hər dəfə eyni marşrutla hərəkət edir, məhsulları dəyişməz ardıcıllıqla seçir və əvvəl keçdikləri şöbələrə geri qayıtmağı sevmirlər. Psixoloqların fikrincə, bu davranış heç də həmişə həddindən artıq nəzarət ehtiyacından qaynaqlanmır. Əksinə, bu, beynin zehni enerjiyə qənaət etmək üsullarından biri ola bilər.

HİT.az xəbər verir ki, bu barədə “Psychologies” nəşrində dərc olunan məqalədə bildirilir.

Mütəxəssislərin fikrincə, alış-veriş zamanı insan çoxsaylı qərarlar verməli olur. Hansı məhsulu seçmək, qiymətləri müqayisə etmək və hansı şöbəyə baş çəkmək kimi məsələlər müəyyən zehni diqqət tələb edir. Eyni marşrutdan istifadə etmək isə bu yükü azaldır.

“Journal of Personality and Social Psychology” jurnalında dərc olunan araşdırma da göstərib ki, vərdiş halına gəlmiş hərəkətlər qeyri-adi davranışlarla müqayisədə daha az şüurlu diqqət tələb edir. Beləliklə, insan hər dəfə yeni qərarlar vermək əvəzinə, artıq tanış olduğu davranış modelinə əsaslanır.

Digər tərəfdən, eyni qaydada alış-veriş etmək insana rahatlıq və proqnozlaşdırıla bilənlik hissi verir. Psixoloqlar qeyd edirlər ki, insanlar çox vaxt dəyişiklik etmək imkanı olsa belə, mövcud vəziyyəti qorumağa üstünlük verirlər.

Bu vərdişin stresslə də əlaqəsi var. “The Journal of Neuroscience” jurnalında dərc olunan tədqiqatın nəticələrinə görə, insan stress altında olduqda şüurlu şəkildə məqsəd seçməkdənsə, əvvəldən formalaşmış davranış modellərinə daha çox üstünlük verir.

Bu baxımdan, supermarketdə eyni marşrutla hərəkət etmək gündəlik həyatın gərginliyi fonunda müəyyən sabitlik yarada bilər. Tanış ardıcıllıq insanın əlavə qərarlar vermək ehtiyacını azaldır.

Bununla belə, mütəxəssislər vurğulayırlar ki, bu davranışın özü insanda konkret stress səviyyəsinin və ya psixoloji problemin mövcudluğunu göstərmir.

Samir