Balıq yağı və omeqa-3 yağ turşularının beyin sağlamlığına müsbət təsir göstərdiyi düşünülsə də, yeni araşdırma bu əlavələrin demensiyanın qarşısını almaqda gözlənilən nəticəni vermədiyini ortaya qoyub.

HİT.az xəbər verir ki, bu barədə fr.de nəşri məlumat yayıb.

ABŞ-ın Cənubi Kaliforniya Universitetinin alimləri təxminən 200 yaşlı insanın iştirakı ilə araşdırma aparıblar. Tədqiqatın məqsədi omeqa-3 yağ turşularının, xüsusilə DHA-nın (dokozageksaen turşusu) beyin qocalmasını ləngidib-ləngitmədiyini müəyyənləşdirmək olub.

İki il davam edən araşdırmada iştirakçıların orta yaşı 66 olub. Onların heç birində demensiya aşkarlanmayıb, lakin Altsheymer xəstəliyinə tutulma riski yüksək qiymətləndirilib. İştirakçıların qidalanmasında DHA-nın miqdarı da aşağı olub. Təxminən yarısında Altsheymer riskini artıran APOE gen variantı müəyyən edilib.

Nəticələr göstərib ki, omeqa-3 qəbul edən şəxslərin onurğa beyni mayesində DHA-nın səviyyəsi altı aydan sonra 17 faiz artsa da, bu dəyişiklik yaddaş göstəricilərinin yaxşılaşmasına səbəb olmayıb. Onlar yaddaş testlərində nəzarət qrupundan üstün nəticə göstərməyiblər.

Bundan başqa, yaddaş prosesində mühüm rol oynayan hipokampusun kiçilmə sürətində də nəzərəçarpacaq dəyişiklik qeydə alınmayıb.

Tədqiqatçılar hesab edirlər ki, beyin sağlamlığı baxımından yalnız omeqa-3 yağ turşularının orqanizmə daxil olması deyil, onların mərkəzi sinir sistemində necə emal edilməsi də əhəmiyyətlidir.

Araşdırmanın nəticələri *eBioMedicine* elmi jurnalında dərc olunub. Alimlərin gəldiyi qənaətə görə, yüksək dozada omeqa-3 qəbulu belə Altsheymer xəstəliyinin qarşısının alınması və yaddaşın qorunması üçün etibarlı vasitə hesab edilə bilməz. Bununla belə, tədqiqat omeqa-3-ün digər mümkün sağlamlıq faydalarını istisna etmir.

Samir