Hicab dedikdə çoxlarının gözləri önündə ilk növbədə təmkinli davranışı, həyalı duruşu, ölçülü danışığı və özünə hörmət edən qadın obrazı canlanır. 

Cəmiyyətdə uzun illər formalaşmış belə bir təsəvvür var: insanın geyimi onun şəxsi seçimi olmaqla yanaşı, daşıdığı mənəvi dəyərlərin də ifadəsinə çevrilə bilər. Lakin bəzən gördüklərimiz bizi bu təsəvvürləri yenidən nəzərdən keçirməyə vadar edir.

Son günlər məktəblərdə vahid geyim qaydaları ətrafında yaranan müzakirələr də məhz bu baxımdan düşündürücüdür. Məktəb ilk növbədə təhsil, intizam və qarşılıqlı hörmət məkanıdır. Burada müəyyən edilmiş qaydaların məqsədi təhsil mühitində vahid yanaşmanı qorumaqdır. Bu qaydalarla bağlı narazılıqlar ola bilər, valideynlər suallar verə, mövqelərini bildirə, qərarların yenidən nəzərdən keçirilməsini tələb edə bilərlər. Ancaq bütün bunların bir həddi var etirazın ifadə forması başqasının ləyaqətini alçaltmamalı, təhqirə və aqressiyaya çevrilməməlidir.

Məktəblərdə baş verən son hadisələrin görüntülərində bəzi hicablı qadınların müəllimlərə, mühafizəçilərə və polis əməkdaşlarına qarşı aqressiv davranışının, təhqiramiz ifadələr işlətməsinin şahidi olduq. Bu mənzərə, təbii ki, cəmiyyətdə suallar doğurdu. Bir zamanlar hicablı qadın obrazı ilə əlaqələndirdiyimiz təmkin və həya anlayışları ilə ekranda gördüyümüz davranışlar arasında ciddi ziddiyyət vardı.

Bəs hicablı qadın necə olmalıdır?

Əslində, bu sualın cavabını yalnız geyimdə axtarmaq doğru deyil. Hicab qadının zahiri görünüşünün bir hissəsi ola bilər, amma insanın xarakterini, danışıq mədəniyyətini və başqalarına münasibətini təkbaşına müəyyən etmir. Baş örtüyü insanı avtomatik olaraq daha səbirli, daha nəzakətli və ya daha anlayışlı etmir. Bunlar insanın öz üzərində işləməsi, davranışına nəzarət etməsi və başqalarının hüquqlarına hörmət göstərməsi ilə formalaşır.

Hicabın mənəvi məna daşıdığına inanan insan üçün bu geyimin yaratdığı məsuliyyət hissi də önəmli olmalıdır. Sakit danışmaq, qəzəblənəndə özünü idarə etmək, qarşısındakını təhqir etməmək, fərqli düşüncəyə dözümlü yanaşmaq - bunlar nə yalnız hicablı qadına, nə də yalnız dindar insana aid tələblərdir. Bunlar hər bir yetkin insanın davranışında görmək istədiyimiz keyfiyyətlərdir.

Məktəb əməkdaşlarına və polisə qarşı təhqir, aqressiya və söyüş hansı geyimdə olan insan tərəfindən törədilməsindən asılı olmayaraq qəbuledilməzdir. Haqlı olduğunu düşünən insan belə mövqeyini təhqirə əl atmadan müdafiə etməyi bacarmalıdır. Çünki davranış tərzi bəzən söylədiyimiz sözlərdən daha çox şey danışır.

Hicab başı örtə bilər, amma insanın davranışına nəzarət etməyi onun əvəzinə bacarmaz. Əsl tərbiyə isə məhz insanın özünü idarə edə bildiyi anlarda görünür.

Sevinc