"Android" planşeti almaq onun bir neçə ildən sonra mütləq dəyişdirilməli olacağı anlamına gəlmir. "BGR" nəşrinin yazdığına görə, istifadəçilərin təcrübəsi göstərir ki, müasir planşetlər gözləniləndən xeyli uzun müddət xidmət göstərə bilir.
Hit.az xəbər verir ki, ixtisaslaşmış forumlarda istifadəçilərin sözlərinə görə, əksər "Android" planşetləri ciddi problemlər olmadan 3–5 il işləyir. Diqqətli istifadə və düzgün qulluq sayəsində isə onların xidmət müddəti 7 ilə, bəzi hallarda isə bundan da çox ola bilər.
Məsələn, istifadəçilərdən biri qeyd edib ki, onun "Samsung Galaxy Tab S7+" planşeti beş ildən sonra da tam işlək vəziyyətdədir. "Galaxy Tab" seriyasının digər sahibləri də bildirirlər ki, "Samsung"un flaqman modelləri adətən 3–5 il yüksək məhsuldarlığını qoruyur, "Galaxy Tab S9 FE" kimi orta seqment cihazlar isə ən azı 3 il problemsiz xidmət göstərir.
Əsas problem proqram təminatıdır
İstifadəçilərin fikrincə, planşetlərin ömrünü məhdudlaşdıran əsas amil texniki hissələr deyil.
Müasir planşetlər nadir hallarda aparat nasazlığı səbəbindən sıradan çıxır. Əksər hallarda onların dəyişdirilməsinə səbəb istehsalçının proqram təminatı yeniləmələrini dayandırması olur.
"Reddit" istifadəçilərindən biri bildirib ki, uzun illər ərzində büdcə seqmentinə aid "Android" planşetlərindən istifadə etsə də, yalnız nadir hallarda, məsələn, şarj girişinin zədələnməsi kimi texniki problemlərlə qarşılaşıb. Lakin zaman keçdikcə yeni "Android" versiyaları daha çox resurs tələb etdiyindən cihazlar yavaşlamağa başlayıb.
Oxşar vəziyyət smartfonlarda da müşahidə olunur. İstifadəçilərdən biri səkkiz illik "Samsung A5" modelinin hələ də işlədiyini, lakin köhnə "Android" versiyasına görə artıq "Google Chrome" brauzerini dəstəkləmədiyini bildirib. Nəticədə cihaz texniki nasazlığa görə deyil, köhnəlmiş proqram təminatına görə dəyişdirilib.
Planşetin istifadə müddətini necə uzatmaq olar?
İstifadəçilərin sözlərinə görə, planşetin daha uzunömürlü olması üçün düzgün istifadə və batareyaya qayğı vacibdir.
Mütəxəssislər cihazın həddindən artıq qızmasının qarşısını almağı, batareyanın tam boşalmasına imkan verməməyi və daxili yaddaşı daim maksimum səviyyədə doldurmamağı tövsiyə edirlər.
Bu qaydalara əməl edildikdə hətta münasib qiymətli modellər də 5 il və daha uzun müddət aktual qala bilər.
Nəticə etibarilə, istifadəçilərin əksəriyyəti hesab edir ki, "Android" planşetlərinin real istifadə müddəti orta hesabla 3–5 ildir. Keyfiyyətli modellər isə düzgün qulluq göstərildikdə 5–7 il, hətta daha uzun müddət etibarlı şəkildə işləyə bilər.
Buna görə də planşet seçərkən yalnız texniki göstəricilərə deyil, istehsalçının neçə il proqram yeniləmələri təqdim edəcəyinə də diqqət yetirmək tövsiyə olunur.
Samir
