Böyük izdihamlara və güclü istiyə baxmayaraq, iyul hələ də yay tətili üçün ən populyar ay olaraq qalır, çünki ailəli turistlər və tələbələr üçün əsas məzuniyyət dövrüdür.
HİT.az xəbər verir ki, "The Independent" nəşrinə açıqlama verən Hotel Planner şirkətinin baş direktoru və həmtəsisçisi Tim Hentşel bildirib ki, 2026-cı ildə səyahət qərarları daha düşünülmüş şəkildə verilir.
“Məsafələr seçilmir, turistlər artıq rahatlıq, sıxlıq və ümumi təcrübə kimi faktorları daha ciddi nəzərə alırlar”, deyə o qeyd edib.
Mütəxəssisin sözlərinə görə, Cənubi Avropa hələ də günəşli iqlimi və canlı atmosferi ilə yay mövsümünün əsas istiqaməti olaraq qalır. Lakin bir çox səyahətçi daha az tanınan və daha sakit alternativlərə yönəlir.
Aşağıda ekspertlərin tövsiyə etdiyi 2026-cı ilin iyul ayı üçün 4 ən yaxşı Avropa istiqaməti təqdim olunur.
1. Sloveniya
Much Better Adventures şirkətinin həmtəsisçisi Sem Bryus turistlərə Qərbi Avropanın izdihamlı sahillərindən uzaqlaşmağı tövsiyə edir.
“Biz görürük ki, müştərilərimiz daha az turist olan, daha geniş məkan və təbiət təklif edən istiqamətlər axtarırlar. Sloveniya buna yaxşı nümunədir. Ölkənin təxminən 60%-i meşələrlə örtülüb və çox yaşıl təbiətə malikdir”, – o bildirib.
Ekspert xüsusilə Soça vadisini (firuzəyi rəngli çayı ilə) və Bled gölünü tövsiyə edir. Onun sözlərinə görə, Bled iyulda daha çox turist qəbul etsə də, ölkənin ən tanınmış simalarından biridir.
Sloveniyanın ən böyük gölü Bohin və Boveç şəhəri isə aktiv istirahət və su idmanı sevənlər üçün ideal seçim hesab olunur.
2. Monteneqro
Sloveniya kimi Monteneqro da Qərb turistləri üçün hələ də az tanınan istiqamət sayılır.
Ekspertin sözlərinə görə, bu ölkə Adriatik sahilləri, dağlıq ərazilər, göllər və tarixi şəhərlərin unikal birləşməsini təqdim edir.
O, xüsusilə Tara çayı boyunca pakraft (yüngül sal) ilə rafting etməyi və Avropanın ən dərin kanyonlarından biri olan ərazini görməyi tövsiyə edir.
Həmçinin Durmitor milli parkı – UNESCO siyahısına daxil edilmiş və avtomobil hərəkətinin qadağan olduğu təbiət zonası – xüsusi vurğulanır.
“Burada geniş və vəhşi landşaftlar və dağlara dırmanmaq üçün əla imkanlar var”, deyə ekspert bildirib.
3. Norveç
İyulda daha sərin hava axtaranlar üçün Skandinaviya xüsusilə Norveç tövsiyə olunur.
“Yay ortasında Norveç möhtəşəmdir: uzun gün işığı, fyordlar və təbiət qoynunda sərbəst düşərgə imkanı var. Kayak turları ən çox seçilən fəaliyyətlərdəndir”, deyə Bryus bildirib.
Tim Hentşel də Norveçin fyord bölgələrini xüsusilə vurğulayaraq, iyulun uzun gündüzləri və mülayim temperaturunun təbiət həvəskarları üçün ideal şərait yaratdığını bildirib.
4. Apuliya, İtaliya
Mütəxəssislər xəbərdarlıq edir ki, Cənub-Qərbi İtaliyada iyul ayında hava çox isti ola bilər. Buna baxmayaraq, isti iqlimi sevənlər üçün Apuliya yaxşı alternativdir.
Son illərdə “yeni Toskana” kimi tanınan Apuliya turist sayını artırsa da, hələ də kənd həyatının sakitliyi və ənənəvi atmosferini qoruyur.
Ağ daşlı şəhərləri, Adriatik sahili və yerli mətbəxi ilə tanınan bölgə, Roma və Florensiya kimi şəhərlərin sıxlığından uzaq daha sakit yay tətili təklif edir.
Samir
