Ənənəvi hava hücumundan müdafiə sistemlərinin son münaqişələrdə yetərsiz qalması hərbi texnologiyalarda yeni mərhələnin başlanmasına səbəb olub. Səs sürətini dəfələrlə üstələyən və atmosferdəki havanı istifadə edərək hərəkət edən yeni nəsil raketlərin hazırlanması üçün işlərə başlanılıb.

HİT.az xəbər verir ki, müasir müharibə texnologiyalarında dəqiqələrin, hətta saniyələrin əhəmiyyəti getdikcə artır. Regional münaqişələrdə atılan ənənəvi sursatların inkişaf etmiş müdafiə sistemləri tərəfindən zərərsizləşdirilməsi hərbi strateqləri radikal həllər axtarmağa vadar edib.

Hava hücumundan müdafiə sistemlərini çətin vəziyyətə salacaq sürətə çatmaq qlobal güclərin əsas hədəflərindən birinə çevrilib. ABŞ ordusu da bu ehtiyaca cavab olaraq yeni nəsil sursat konsepsiyasını həyata keçirməyə hazırlaşır.

ABŞ Müdafiə Qabaqcıl Tədqiqat Layihələri Agentliyinin (DARPA) rəhbərlik etdiyi NGHCM layihəsi atmosferdəki havanı yüksək sürətlə qəbul edərək hərəkət edən “scramjet” texnologiyasına əsaslanır. Səs sürətinin ən azı beş mislinə çata bilən bu sistemin döyüş təyyarələri, bombardmançı gəmilər və quruda yerləşən batareyalar da daxil olmaqla müxtəlif platformalardan buraxılması nəzərdə tutulur.

Layihənin əsas məqsədləri arasında təkcə sürət deyil, istehsalın asanlaşdırılması da var. Hazırlanacaq prototiplərin qısa müddətdə sınaqdan keçirilməsi və seriya istehsalına başlanması planlaşdırılır.

Prosesin təcili xarakter almasında əsas amillərdən biri Rusiyanın addımlarıdır. Rusiyanın havadan oksigen alan 3M22 “Zirkon” sistemini silahlanmaya qəbul etməsi Qərb ölkələrindəki araşdırmaları sürətləndirib.

463–3704 kilometr arasında böyük təsir məsafəsini əhatə etdiyi bildirilən layihə çərçivəsində həddindən artıq istiliyə davamlı materiallar və xüsusi yanacaq növləri sınaqdan keçiriləcək. DARPA bu genişmiqyaslı layihədə yalnız ənənəvi müdafiə şirkətləri ilə deyil, innovativ startaplarla da əməkdaşlıq etməyi hədəfləyir.

Samir