Yeni büdcəli aviaşirkət “Fly2Galicia” İspaniyanın Santyaqo-de-Kompostela şəhərindən Avropanın səkkiz şəhərinə birbaşa uçuşlara başlamağa hazırlaşır. 

HİT.az xəbər verir ki, “Euronews”un məlumatına görə, ilk uçuşlar 2026-cı il dekabrın 1-nə planlaşdırılıb. Bu tarix məşhur Santyaqo yolu ilə səyahət edən zəvvarların sayının xüsusilə artdığı dövrə təsadüf edir.

Məlumata görə, “Fly2Galicia” Santyaqo–Rosaliya-de-Kastro hava limanından İspaniyanın Alikante, Qranada və Saraqosa şəhərlərinə, həmçinin ölkə xaricində Brüssel, Praqa, Münhen, Venesiya və Milan istiqamətlərinə uçuşlar həyata keçirəcək.

Biletlərin satışı artıq başlayıb. Ən ucuz təkliflər arasında Milandan Santyaqoya uçuşlar 41 avrodan başlayır. Brüssel, Praqa və Venesiyadan biletlərin qiyməti 51 avrodan, Münhendən uçuşların qiyməti isə 71 avrodan başlayır.

Bununla belə, mühüm bir məqam var. “Euronews”un qeyd etdiyi kimi, “Fly2Galicia” ilk uçuşları özü həyata keçirməyəcək. Uçuşların adının hələ açıqlanmadığı başqa bir Avropa aviaşirkəti tərəfindən yerinə yetirilməsi planlaşdırılır.

Santyaqo-de-Kompostela turizm baxımından maraqlı istiqamətlərdən biri hesab olunur. Şəhərin roman, qotika, barokko və neoklassik memarlıq üslublarını özündə birləşdirən tarixi mərkəzi UNESCO-nun Ümumdünya irsi siyahısına daxil edilib.

Səyahətçilərə həmçinin təzə dəniz məhsulları və yerli məhsulların satıldığı “Mercado de Abastos” bazarını ziyarət etmək tövsiyə olunur.

Digər səyahət imkanları sırasında A-Korunya və Viqo şəhərləri, eləcə də çimərlikləri və adaları ilə tanınan Rias-Bayşas bölgəsi yer alır.

Samir