Soyuducunun qapısı mətbəxdə ən əlçatan yerlərdən biri hesab olunur. Tez-tez istifadə edilən məhsullar – souslar, cemlər və bəzi içkilər üçün rahat görünsə də, bu hissə soyuducunun ən isti və temperaturu ən çox dəyişən sahəsidir. Qapının tez-tez açılıb-bağlanması məhsulların daha tez xarab olmasına səbəb olur.

HİT.az "Martha Stewart"a istinadən xəbər verir ki, bu vəziyyət təkcə qida itkisinə deyil, həm də qida zəhərlənməsi riskinin artmasına gətirib çıxara bilər.

Soyuducu qapısının problemi

Bir çox soyuducu dizayn baxımından qapıda rəflərlə təchiz olunur, lakin bu o demək deyil ki, orada bütün məhsullar saxlanmalıdır. Qapı hissəsində temperatur tez-tez dəyişir və bu, xüsusilə tez xarab olan qidalar üçün risk yaradır.

Mütəxəssislərin sözlərinə görə, temperatur 4°C-dən yuxarı qalxdıqda bakteriyalar sürətlə çoxalmağa başlayır. Bəzi hallarda onların sayı 20 dəqiqə ərzində iki dəfə arta bilər.

Hansı məhsullar qapıda saxlanmamalıdır?

Süd və süd məhsulları

Süd, qaymaq və yumşaq pendirlər sabit temperatur tələb edir. Qapıdakı dəyişkən şərait onların həm dadını, həm də qida dəyərini azaldır.

Yumurta

Bəzi soyuducularda yumurta üçün xüsusi yer qapıda olsa da, bu ən uyğun saxlama yeri deyil. Yumurta daimi soyuq mühitdə daha uzun müddət təzə qalır.

Hazır yeməklər və ət məhsulları

Kolbasa, hazır yeməklər və qalıq yeməklər qapıda saxlanmamalıdır, çünki bu məhsullar tez xarab olur və bakteriya riski yüksəkdir.

Təbii qoz-fındıq pastaları və bəzi yağlar

Temperatur dəyişiklikləri onların tərkibini poza və ayrışmaya səbəb ola bilər.

Təzə sıxılmış şirələr

Bu içkilər oksidləşməyə həssasdır və qapıdakı istilik və işıq onların daha tez xarab olmasına gətirib çıxarır.

Çiy ət və balıq

Qapıda saxlanması qəti tövsiyə edilmir, çünki bu, ciddi qida təhlükəsizliyi riskləri yaradır.

Təzə meyvə və tərəvəz

Giləmeyvə, göyərti və digər təzə məhsullar temperatur dəyişmələrinə çox həssasdır və tez solur və xarab olur.

Qapıda nə saxlamaq olar?

Mütəxəssislər bildirir ki, qapıda daha stabil və az riskli məhsullar saxlanmalıdır. Bunlara ketçup, xardal, turşular, cemlər, sirkə və soya sousu kimi məhsullar daxildir. Onlar yüksək duz, şəkər və ya turşuluq səbəbilə daha davamlıdır.

Soyuducunun qapısı yalnız uzunömürlü və az riskli məhsullar üçün uyğundur. Tez xarab olan qidalar isə həmişə soyuducunun daxili, daha soyuq və sabit hissələrində saxlanmalıdır.

Samir