Normal tənbəllik insanın işi gördükdən sonra dincəlməsi ilə xarakterizə olunur. 

HİT.az xəbər verir ki, Moskva Dövlət Psixologiya və Pedaqogika Universitetinin distant təhsil psixologiyası və pedaqogikası kafedrasının müdiri Mariya Odintsova gazeta.ru-ya açıqlamasında belə deyib.

“Çətin tapşırıqdan sonra stulun arxasına söykənib 10-15 dəqiqə bir nöqtəyə baxırsınızsa, bu, ‘neyronların bərpası’ adlanır. Əgər səhərdən axşama qədər belə oturursunuzsa, bu, artıq narahatedici siqnaldır və məsləhət almağın vaxtıdır”, deyə mütəxəssis bildirib.

Onun sözlərinə görə, tənbəllik və prokrastinasiya bir-biri ilə əlaqəli olsa da, bunlar eyni anlayış deyil. Prokrastinasiya tapşırıqların təxirə salınmasını nəzərdə tutur, tənbəllik isə daha geniş anlayışdır və tapşırığı sonradan yerinə yetirmək niyyəti olmadan ondan yayınmanı da əhatə edir.

“Əsl tənbəllik divanda uzanıb tavana baxdığınız və bundan zövq aldığınız zamandır. Ruhunuz oxuyur, amma vicdanınız yatır. Prokrastinasiya isə divanda uzanıb tavana baxdığınız, daxilinizdə isə ‘hesabat üzərində işləməliyəm, amma yaxşısı seriala baxım’ düşüncəsinin olduğu vəziyyətdir. Bu zaman insan özündən narazı olur, günahkarlıq və narahatlıq hissi keçirir”, deyə Odintsova qeyd edib.

Psixoloqlar hər 1,5-2 saatlıq işdən sonra qısa fasilələr etməyi tövsiyə edirlər. Bu, beynin əldə etdiyi məlumatları emal etməsi üçün lazımdır.

Əgər insan diqqətini cəmləyə bilmədiyini, tapşırıqların yerinə yetirilməsinin çətinləşdiyini və adi işlərin həddindən artıq çox səy tələb etdiyini müşahidə edirsə, bu, həddindən artıq yorğunluğun əlaməti ola bilər. Kənar səslərə və suallara qarşı qıcıqlanma, eləcə də sosial şəbəkələrdə məqsədsiz şəkildə 15 dəqiqədən çox vaxt keçirmək də bu əlamətlər sırasındadır.

Samir