Nəsillər arasında gündəlik həyat vərdişləri və texnologiyaya münasibət baxımından ciddi fərqlər var. 

HİT.az xəbər verir ki, "YourTango"nun yazdığına görə, yaşlı nəsillərin yorulduğu bəzi adi vəziyyətlər gənclər üçün artıq həyatın ayrılmaz hissəsinə çevrilib.

1. Parolları kağıza yazmaq

Yaşlı nəsillərin bir qismi parol menecerlərinə və onlayn yaddaş sistemlərinə tam etibar etmir. Buna görə də parolları kağıza yazır, vacib sənədləri isə çap edib ayrıca qovluqlarda saxlayırlar. Hər yeni hesabın əlavə parol tələb etməsi onlar üçün getdikcə daha yorucu olur.

2. Adi menyu əvəzinə QR-kod

Kafe və restoranlarda menyuya baxmaq üçün telefon kamerasından istifadə etmək də yaşlı nəsillərin xoşuna gəlməyən yeniliklərdəndir. Onların fikrincə, yemək zamanı telefona ehtiyac yaranması masadakı canlı ünsiyyət ab-havasını azaldır.

3. Spam zənglər

Gənclər tanımadıqları nömrələrdən gələn zəngləri çox vaxt sadəcə cavabsız qoyurlar. Yaşlı insanlar isə zəngləri qəbul etməyə daha meyllidirlər. Nəticədə kredit, kampaniya və digər təkliflərlə bağlı spam zənglər onları daha çox yorur.

4. Hər gün axşam yeməyi hazırlamaq

Gənclər yemək bişirməyə həvəs olmadıqda çatdırılma xidmətlərindən daha çox istifadə edirlər. Yaşlı nəsillər isə uzun illər ərzində gündəlik nahar və şam yeməyini özləri planlaşdırıb hazırlayıblar. Buna görə də bu iş onlar üçün artıq yorucu rutinə çevrilə bilər.

5. Gec saatlarda plan qurmaq

Yaş artdıqca insanların daha erkən yatmağa və oyanmağa meyilli olduğu qeyd edilir. Buna görə də gec saatlarda keçirilən görüşlər və gəzintilər yuxu rejimini poza və insanın özünü bir neçə gün narahat hiss etməsinə səbəb ola bilər. Gənclər isə gecə planlarına daha rahat yanaşırlar.

6. Banka getmək

Gənclər Apple Pay, mobil bankçılıq və onlayn pul köçürmələrindən geniş istifadə etdikləri üçün bank filiallarına nadir hallarda gedirlər. Yaşlı nəsillər rəqəmsal xidmətlərdən istifadə etsələr də, bir çox hallarda məsələləri şəxsən həll etməyə üstünlük verirlər. Məhz banka fiziki getmək onlar üçün əlavə narahatlıq yaradır.

7. İş yerində həddindən artıq şəxsi mövzulardan danışmaq

Nəsillər arasındakı ən böyük fərqlərdən biri iş mühitində şəxsi məsələlərin müzakirəsinə münasibətdədir. Bumerlər və X nəsli iş yerində şəxsi problemlərdən və psixi sağlamlıqdan danışmağı peşəkar sərhədlərin pozulması kimi qəbul edə bilərlər. Gənc əməkdaşlar isə bu cür söhbətləri daha normal və hətta iş münasibətlərinin bir hissəsi hesab edirlər.

Beləliklə, texnologiyanın gündəlik həyata daxil olması nəsillərin adi vəziyyətlərə münasibətini də dəyişib. Gənclərin heç fikir vermədiyi bəzi məsələlər yaşlı insanlar üçün əlavə stress və yorğunluq mənbəyinə çevrilə bilər.

Samir