Diyetoloqlar səhər qəhvəsi ilə birlikdə qreypfrutun qəbul edilməsini tövsiyə etmirlər. Mütəxəssislərin fikrincə, bu kombinasiya kofeinin təsirini uzada, mədə yanmasına səbəb ola və bəzi dərmanlarla təhlükəli qarşılıqlı təsir yarada bilər.

Hit.az xəbər verir ki, "Parade" nəşrinin yazdığına görə, qəhvə adətən acqarına içildiyi üçün onun müxtəlif qida məhsulları ilə qarşılıqlı təsiri daha aydın hiss olunur.

Diyetoloq Kris Mor bildirib ki, bir çox insan hər gün eyni səhər vərdişlərinə əməl etdiyindən qəhvə ilə birlikdə qəbul edilən qidalar həm həzm prosesinə, həm də gün ərzində ümumi əhval-ruhiyyəyə təsir göstərə bilər.

Onun sözlərinə görə, bu, qəhvənin yeməklə birlikdə qəbul edilməsinin zərərli olduğu anlamına gəlmir. Əksinə, qida kofeinin sorulmasını ləngidərək enerji artımını daha sabit edə və əllərdə titrəmənin, həmçinin mədə yanmasının qarşısını ala bilər. Lakin bunun üçün düzgün qida seçimi vacibdir.

Nəşr qeyd edir ki, dietoloqlar səhər qəhvəsi ilə birlikdə xüsusilə bir məhsulun – qreypfrutun qəbulunu məsləhət görmürlər.

Mütəxəssislərin sözlərinə görə, həm bütöv qreypfrut, həm də qreypfrut şirəsi kofeinin təsir müddətini uzada, mədə yanmasına səbəb ola və müəyyən dərman preparatları ilə qarşılıqlı təsirə girə bilər.

Diyetoloq Culiya Zumpano qreypfrutun kofein qəbulundan ən azı 10 saat sonra yeyilməsini tövsiyə edir.

"Mən qreypfrutu kofein qəbulundan ən azı 10 saat sonra yeməyi məsləhət görürəm ki, bu müddət ərzində kofeinin təxminən 75 faizi orqanizmdən xaric olsun. Kofeinin tamamilə xaric olması isə 25–30 saat çəkə bilər", deyə o bildirib.

Bununla yanaşı, mütəxəssis vurğulayıb ki, kofeinin metabolizmi hər insanda fərqlidir.

"Əgər kofeini yavaş metabolizə edirsiniz və qreypfrutla birlikdə qəbul etdikdə titrəmə, narahatlıq və ya digər mənfi təsirlərin gücləndiyini hiss edirsinizsə, bu kombinasiyadan tamamilə imtina etməlisiniz. Qreypfrutla qarşılıqlı təsir göstərən dərmanlar qəbul edən şəxslər isə ya ondan istifadə etməməli, ya da həkim və ya əczaçı ilə məsləhətləşməlidirlər", deyə Zumpano əlavə edib.

O qeyd edib ki, qreypfrut şirəsi bütöv meyvədən daha konsentrasiyalı olduğuna görə kofeinin təsirini daha da uzada, mədə yanmasını gücləndirə və dərmanlarla qarşılıqlı təsiri artıra bilər.

Niyə qreypfrut kofeinin təsirini uzadır?

Dietoloq Malina Malkani bildirib ki, qreypfrut insan orqanizmində kofeinin parçalanmasına cavabdeh olan CYP1A2 fermentinin fəaliyyətini zəiflədə bilər. Nəticədə kofein orqanizmdə daha uzun müddət qalır.

Onun sözlərinə görə, kofeinə həssas insanlarda bu vəziyyət titrəmə, narahatlıq, ürək döyüntüsünün sürətlənməsi və yuxu pozğunluğu kimi əlamətlərə səbəb ola bilər. Lakin əksər insanlarda bu təsir zəif olur və nəzərə çarpmaya bilər.

Kris Mor əlavə edib ki, CYP1A2 fermenti yalnız kofeinin deyil, bir çox dərman preparatlarının da parçalanmasında iştirak edir. Fermentin fəaliyyəti zəiflədikdə dərmanların orqanizmdə konsentrasiyası gözləniləndən yüksək ola bilər və bu təsir bir neçə gün davam edə bilər.

Diyetoloqun sözlərinə görə, bu xüsusilə aşağıdakı preparatlara aiddir:

* xolesterinin azaldılması üçün istifadə olunan statinlər;
* bəzi təzyiq və ürək ritmi pozğunluqları əleyhinə dərmanlar;
* orqan transplantasiyasından sonra təyin olunan preparatlar;
* bəzi sakitləşdirici vasitələr;
* bəzi allergiya əleyhinə dərmanlar.

Samir