"iPhone" batareyası cihazın ən bahalı komponentlərindən biridir. Lakin bir çox istifadəçi fərqinə varmadan etdiyi səhvlərlə onun daha tez köhnəlməsinə səbəb olur.
Hit.az xəbər verir ki, "BGR" nəşrinin mütəxəssisləri batareyanın ömrünü uzatmaq üçün qaçınılmalı olan dörd əsas səhvi açıqlayıblar.
Litium-ion batareyalar zamanla təbii şəkildə tutumunu itirir. Ancaq düzgün olmayan şarj vərdişləri bu prosesi xeyli sürətləndirə bilər.
Ən vacib məqamlardan biri cihazın həddindən artıq qızmasının qarşısını almaqdır. Şarj zamanı telefon müəyyən qədər isinməsi normaldır, lakin əlavə istilik batareyadakı kimyəvi aşınmanı sürətləndirərək onun tutumunun daha tez azalmasına səbəb olur.
1. Batareyanı daim 100 faizə qədər doldurmaq
"iPhone" batareyasını 100 faizə qədər doldurmaq təhlükəli olmasa da, bunu davamlı şəkildə etmək batareyaya əlavə yük yaradır. Litium-ion batareyalar uzun müddət yüksək gərginlik altında qalmağa həssasdır və bu, onların daha tez köhnəlməsinə səbəb olur.
"iPhone 15" və daha yeni modellərin istifadəçiləri maksimal şarj səviyyəsini məhdudlaşdıra bilərlər. Bunun üçün "Parametrlər" → "Batareya" → "Şarj" bölməsinə daxil olaraq istənilən limiti seçmək kifayətdir.
2. "Optimallaşdırılmış şarj" funksiyasını söndürmək
"Apple" istifadəçilərə daxili "Optimallaşdırılmış şarj" funksiyasından istifadə etməyi tövsiyə edir.
Bu funksiya istifadəçinin şarj vərdişlərini öyrənir, batareyanı uzun müddət təxminən 80 faiz səviyyəsində saxlayır və yalnız cihazın adətən elektrikdən ayrıldığı vaxta yaxın 100 faizə qədər doldurur.
Beləliklə, batareyanın yüksək gərginlik altında qalma müddəti azalır və onun aşınması ləngiyir.
3. Şarj zamanı oyun oynamaq və ağır tətbiqlərdən istifadə etmək
Oyunlar, video montajı, foto emalı və digər yüksək resurs tələb edən proqramlar prosessorun daha intensiv işləməsinə səbəb olur və nəticədə cihaz daha çox qızır.
Şarj prosesi özü də istilik yaratdığı üçün əlavə yük həddindən artıq qızmaya səbəb ola bilər. Mütəxəssislər şarj zamanı yalnız sadə əməliyyatlardan istifadə etməyi və ya telefonu ümumiyyətlə rahat buraxmağı məsləhət görürlər.
4. Sertifikatsız şarj cihazlarından istifadə etmək
"iPhone" üçün orijinal "Apple" aksesuarlarından və ya "MFi" ("Made for iPhone") sertifikatına malik şarj cihazlarından istifadə etmək tövsiyə olunur.
Belə aksesuarlar uyğunluq və təhlükəsizlik baxımından ciddi yoxlamalardan keçir.
Sertifikatsız adapterlərdən istifadə isə cihazın həddindən artıq qızmasına, cərəyanın qeyri-sabit ötürülməsinə, şarj girişinin zədələnməsinə və hətta smartfonun sıradan çıxmasına səbəb ola bilər. Buna görə alış zamanı məhsulun həqiqətən "MFi" sertifikatına malik olduğuna diqqət yetirmək vacibdir.
Mütəxəssislərin sözlərinə görə, bu sadə qaydalara əməl etmək batareyanın deqradasiyasını yavaşlada və onun tutumunu uzun illər qorumağa kömək edə bilər. Həmçinin "Apple" yaxın zamanda "iPhone 11" və daha yeni modellər üçün "iOS 27" əməliyyat sisteminin ictimai beta versiyasını istifadəyə verib və istifadəçilər yeni sistemi rəsmi buraxılışdan əvvəl sınaqdan keçirə bilirlər.
Samir
