ABŞ İrandan Yəməndə husilərə yük daşıyan gəmilərin yoxlanılması zamanı ələ keçirilən beş mindən çox silahı Ukrayna Silahlı Qüvvələrinə təhvil verib. 

HİT.az xəbər verir ki, bu barədə ABŞ Mərkəzi Komandanlığı (CENTCOM) X sosial şəbəkəsində məlumat yayıb.

Bu yükə AK-47 avtomatları, pulemyotlar, snayper tüfəngləri və RPQ-7 əl tipli tank əleyhinə qumbaraatanlar daxildir. Ukrayna bu silahları və 7,62 mm çaplı 500 mindən çox patronu aprelin 4-də alıb.

CENTCOM-un məlumatına görə, bu atıcı silahlar bir Ukrayna briqadasını təchiz etmək üçün kifayətdir. Komandanlığın bəyanatında deyilir ki, əməliyyat zamanı, 2021-ci ilin mayından 2023-cü ilin fevralına qədər bu kiçik silahlarla Yəmənə gedən cəmi 4 yük gəmisi saxlanılıb.

Aprelin əvvəlində "Bloomberg" agentliyi bildirib ki, NATO-nun baş katibi Yens Stoltenberq alyansın ABŞ-da keçiriləcək sammitində hazırda Pentaqonun idarə etdiyi Kiyevə hərbi yardım üzrə təmas qrupunun təşkilatın nəzarətinə verilməsini təklif edəcək.

Samir