Paytaxt bazarlarında kənd yumurtasının qiyməti son bir ay, bir ay yarım ərzində 25-30 qəpikdən 40 qəpiyə yüksəlib. Satıcılar bahalaşmanı əsasən kənd toyuqlarının yumurtlama səviyyəsinin azalması, mövsümi amillər və tələbatın artması ilə əlaqələndirirlər.
Liberal İqtisadçılar Mərkəzinin sədri Akif Nəsirli “Bakupost”a kənd yumurtasının qiymətindəki artımın əsas səbəbinin təklifin mövsümi azalması olduğunu bildirib.
“Kənd şəraitində saxlanılan toyuqlarda havaların soyuması, gün işığının azalması və yemlənmə şəraitinin dəyişməsi yumurtlama intensivliyini aşağı sala bilər. Bu zaman bazara çıxarılan kənd yumurtasının həcmi azalır, tələbat isə əvvəlki səviyyədə qalırsa, qiymət yüksəlir.
Burada yem xərclərinin artması da nəzərə alınmalıdır. Toyuğun yumurtlama səviyyəsi aşağı düşdüyü halda bir yumurtaya düşən yem və saxlanma xərci artır. Xüsusilə kiçik təsərrüfatlarda istehsal həcmi az olduğundan bu xərc artımı qiymətə daha tez yansıya bilər. Kənd yumurtasının bazara çıxarılmasında vasitəçi və nəqliyyat xərcləri də qiymətin formalaşmasına təsir edir.
Soyuq havaların başlaması qiymətə müəyyən qədər əlavə təzyiq göstərə bilər. Lakin bunu yalnız temperaturla izah etmək düzgün olmaz. Yem qiymətləri, kənd təsərrüfatında istehsal xərcləri, bazara çıxarılan yumurtanın həcmi və tələbat birlikdə qiymətin istiqamətini müəyyənləşdirir”.
Mütəxəssis bildirib ki, qarşıdakı aylarda kənd yumurtasında əlavə bahalaşma ehtimalını tam istisna etmək olmaz.
“Xüsusilə qış aylarında kənd toyuqlarının yumurtlama səviyyəsi aşağı qalarsa, təklif məhdudlaşa və qiymət yüksək səviyyədə qala bilər. Lakin havaların mülayimləşməsi və yaz aylarında yumurta istehsalının bərpası qiymət artımını zəiflədə bilər. Buna görə hazırkı artımın bütünlüklə davamlı və sürətli bahalaşmaya çevriləcəyini demək üçün əlavə bazar amilləri də nəzərə alınmalıdır.
Kənd yumurtasının bahalaşması digər yumurta növlərinə də dolayı təsir göstərə bilər. Əgər istehlakçıların bir hissəsi bahalaşan kənd yumurtasından sənaye üsulu ilə istehsal olunan yumurtaya keçərsə, həmin məhsula tələbat arta bilər. Bu isə digər yumurta növlərinin qiymətinə müəyyən təzyiq yarada bilər. Ancaq sənaye istehsalında həcmlər daha böyük və istehsal prosesi daha sabit olduğu üçün kənd yumurtasındakı mövsümi azalma eyni miqyasda digər yumurta növlərinin qiymətinə keçməyə bilər”, – deyə Akif Nəsirli bildirib.
