Azərbaycan və Özbəkistan arasında son illərdə möhkəmlənən münasibətlər yalnız siyasi və iqtisadi əməkdaşlıqla məhdudlaşmır. 

İki ölkə arasında təhsil və elm sahəsində də yeni əməkdaşlıq imkanları formalaşır. Universitetlərarası əlaqələrin genişlənməsi, akademik mübadilələrin artırılması və birgə layihələrin həyata keçirilməsi bu tərəfdaşlığın daha uzunmüddətli və dayanıqlı xarakter almasına şərait yaradır. 

Bəs Azərbaycan-Özbəkistan təhsil əməkdaşlığında hansı istiqamətlər prioritetdir? Həmçinin, bu əlaqələr gələcəkdə hansı nəticələri vəd edir?

Təhsil eksperti Elçin Əfəndi Hit.az-a açıqlamasında deyib ki, Azərbaycan və Özbəkistanın elm və təhsil sahəsində birgə fəaliyyət imkanlarının artırılması hər iki ölkə üçün yeni akademik və peşəkar perspektivlər yaradır:

“Bu prosesdə tələbələrin qarşılıqlı təhsil imkanlarından yararlanması, universitetlər arasında təcrübə mübadiləsinin gücləndirilməsi və müasir tədris yanaşmalarının paylaşılması xüsusi əhəmiyyət kəsb edir.

Ali təhsil müəssisələri arasında qurulan yeni tərəfdaşlıqlar yalnız mövcud əlaqələrin genişlənməsinə deyil, həm də birgə təhsil təşəbbüslərinin və elmi fəaliyyətin inkişafına zəmin yaradacaq.

Təhsil sahəsində əməkdaşlığın dərinləşdirilməsi gələcəkdə hər iki ölkənin gəncləri üçün daha geniş akademik imkanların formalaşmasına və onların beynəlxalq təcrübəyə çıxışının artmasına şərait yarada bilər”.

Ekspert bildirib ki, Azərbaycan və Özbəkistan arasındakı tarixi bağlılıq və mədəni oxşarlıqlar isə bu əməkdaşlığın daha rahat inkişaf etdirilməsi üçün əlverişli zəmin yaradır:

“İki ölkənin ortaq tarixi keçmişi və bir-birinə yaxın ictimai-mədəni mühiti tələbələrin xarici təhsil mühitinə uyğunlaşması baxımından müəyyən üstünlüklər formalaşdırır. Bu amilin qarşılıqlı tələbə və müəllim mübadiləsinin daha səmərəli təşkilinə də müsbət təsir göstərməsi mümkündür.

Bununla yanaşı, Azərbaycan və özbək dillərinə marağın artırılması gənclər arasında ünsiyyət imkanlarını genişləndirə və xalqlar arasındakı mədəni əlaqələrin yeni nəsil vasitəsilə daha da möhkəmlənməsinə xidmət edə bilər.

Beləliklə, təhsil əməkdaşlığı iki ölkə arasında yalnız akademik əlaqələrin qurulması vasitəsi deyil, həm də gələcək nəsillər arasında qarşılıqlı anlaşmanın və uzunmüddətli tərəfdaşlığın gücləndirilməsi üçün mühüm platforma rolunu oynayacaq”.

Günel Cəlilova