Keçmiş NATO Strateji təhlil və planlaşdırma qrupunun rəhbəri Stefani Babst hesab edir ki, alyans Rusiya ilə birbaşa hərbi qarşıdurmadan yayınmaq üçün mümkün olan hər şeyi edir.
HİT.az-ın məlumatına görə, Babst "Ukrinform" nəşrinə müsahibəsində bildirib ki, Rusiyanın NATO ölkələrinə ordu vasitəsilə hücum edəcəyinə inanmır. Onun fikrincə, Moskvanın alyans ölkələrini daxildən sabitsizləşdirmək üçün kifayət qədər "hibrid alətləri" var.
"Mən heç vaxt Rusiyanın Baltikyanı ölkələrdən birinə adi silahlardan istifadə etməklə hücum edəcəyinə inanmamışam və indi də inanmıram. Kreml bizim ölkələrimizi daxildən sabitsizləşdirmək üçün hibrid alətlərində kifayət qədər vasitəyə malikdir. Mənim üçün aydındır ki, NATO Rusiya ilə birbaşa hərbi toqquşmadan yayınmaq üçün əlindən gələni edir. Yaxın gələcəkdə bu yanaşmanın dəyişəcəyini görmürəm", – Babst vurğulayıb.
Onun sözlərinə görə, NATO-nun şərq cinahındakı müdafiə mövqeyi və çəkindirmə siyasəti hazırda inandırıcıdır və Rusiya alyansın üzvü olan ölkələrdən birinə hərbi hücum imkanını nəzərdən keçirmir.
Bununla belə, Babst NATO-nun çəkindirmə strategiyasında "müəyyən zəif nöqtələrin" olduğunu və alyansın fəaliyyətinin "həddindən artıq proqnozlaşdırıla bilən" xarakter daşıdığını qeyd edib.
Ekspert həmçinin NATO ölkələrinin Rusiya ilə bağlı gələcəkdə hansı addımların atılacağına dair "aydın və razılaşdırılmış mövqeyinin" olmadığını bildirib. Onun sözlərinə görə, NATO və Avropa İttifaqı "hibrid müharibəyə" qarşı vahid yanaşma hazırlamayıb, hər bir insidenti ayrıca hadisə kimi qiymətləndirir və kiberməkanda mümkün hücum xarakterli əks tədbirlərin nəzərdən keçirilməsindən yayınır.
"Bu iki təşkilata inteqrasiya olunmuş dayanıqlılıq planlaşdırması və təlim mexanizmi lazımdır. Moskvanın hibrid hücumlarına qarşı vasitələrimiz və prosedurlarımız hərbi imkanlarımız kimi planlaşdırılmalı və stress-testlərdən keçirilməlidir", deyə Babst bildirib.
Onun fikrincə, NATO kritik infrastrukturun kiberhücumlardan, dezinformasiya kampaniyalarından və təxribat aktlarından qorunması üçün hərbi planlaşdırma mexanizminə bənzər sistem yaratmalıdır. Babst ideal variant kimi NATO və Aİ-nin belə mexanizmi birgə formalaşdırmasını göstərib.
Samir
