ABŞ-ın Cənubi Karolina ştatında Respublikaçılar Partiyasının Senat seçkiləri üzrə praymerizində Darlin Qrem qalib gəlib. Bununla o, noyabrda keçiriləcək seçkilərdə Senatda tam müddətə yer uğrunda mübarizə aparmaq hüququ əldə edib.
HİT.az xəbər verir ki, mərhum senator Lindsi Qremin bacısı Darlin Qrem praymerizin ikinci turunda ABŞ Nümayəndələr Palatasının üzvü Ralf Normana qalib gəlib.
Lindsi Qremin ölümündən sonra Cənubi Karolina qubernatoru onun bacısını senator təyin edib. Darlin Qrem mərhum qardaşının səlahiyyət müddətinin qalan hissəsini başa çatdırmaq üçün bu vəzifəyə gətirilib.
Qrem qısa müddət ərzində siyasətdə təcrübəsiz olmasına baxmayaraq, ABŞ Prezidenti Donald Trampın dəstəyini qazanıb. Tramp onu tam müddətə namizədliyini irəli sürməyə çağırıb və Qrem kampaniya zamanı prezidentə dəstəyini dəfələrlə vurğulayıb.
Onun praymerizdəki qələbəsi Tramp üçün də siyasi baxımdan əhəmiyyətli hesab olunur. ABŞ liderinin mərhum senatorun varisini müəyyənləşdirmək prosesində fəal iştirak etdiyi bildirilir. Qremin Senatda Trampın siyasətini dəstəkləyən daha bir səsə çevrilə biləcəyi gözlənilir.
Bununla belə, Qremin siyasi təcrübəsinin azlığı seçki kampaniyasında müzakirə mövzusuna çevrilib. Respublikaçı namizədlərin yeganə debatında ona qardaşının əsas fəaliyyət istiqamətlərindən biri olan xarici siyasətlə bağlı sual verilib. Tayvan və Cənubi Çin dənizində ABŞ-ın maraqları barədə suala cavab verərkən Qrem tərəddüd edib və milli təhlükəsizliyin onun ixtisas sahəsi olmadığını bildirib.
Qrem isə Senatda əsas diqqətini daxili məsələlərə, xüsusilə mənzil əlçatanlığına yönəltmək istədiyini deyib. Ralf Norman onun bu cavabını vəzifə üçün kifayət qədər hazırlıqlı olmamasının göstəricisi kimi qiymətləndirib.
Noyabr ayında keçiriləcək əsas seçkidə Darlin Qremin rəqibi Demokratlar Partiyasının namizədi Enni Endryus olacaq. Cənubi Karolinada isə demokratların Senat seçkilərində qalib gəlməsi uzun illərdir baş vermir.
Qremin seçkidə qalib gəlməsi halında o, mərhum qardaşı Lindsi Qremin yerini Senatda tam müddətə tutacaq.
Samir
