Torlu piton dünyanın ən uzun ilanı hesab olunur. Bu yırtıcı Cənubi və Cənub-Şərqi Asiyanın tropik meşələrində, çəmənliklərdə, meşəlik ərazilərdə, hətta bəzi hallarda kanalizasiyalarda yaşayır.
HİT.az xəbər verir ki, "BBC Wildlife"ın məlumatına görə, torlu piton eyni zamanda dünyanın ən ağır üç ilan növündən biridir.
Məlumata əsasən, indiyədək qeydə alınmış ən uzun torlu piton 1912-ci ildə aşkarlanıb və uzunluğu 10 metrə çatıb. Əsirlikdə saxlanılan ən uzun piton isə ABŞ-da yaşayan və uzunluğu 7,67 metr olan dişi fərd olub.
Torlu pitonlar, digər pitonlar kimi, pusqu quraraq ovlayan yırtıcılardır. Onlar ovlarının kifayət qədər yaxınlaşmasını gözləyir və sonra hücuma keçirlər. Bu ilan zəhərli deyil, lakin boğucu ilanlar qrupuna daxildir. Yəni ovunu bədəni ilə halqavari şəkildə sararaq tədricən boğur və öldükdən sonra onu yeyir.
Adətən məməlilər və quşlarla qidalanan bu ilanların kiçik fərdləri gəmiricilər və yarasalar kimi daha xırda heyvanları, iri fərdləri isə sivetləri, primatları, donuzları və maralları ovlayır. İnsan məskənlərinin yaxınlığında toyuq, pişik və itləri də tuta bildiyi məlumdur.
Torlu pitonların insanlara hücum etdiyi və onları ovladığı hallar da qeydə alınıb. 2022-ci ilin oktyabr ayının sonunda İndoneziyada 54 yaşlı Cara adlı qadının meyiti 7 metrlik ilanın bədəninin içərisində tapılıb.
Qadın rezin plantasiyasında işləməyə getdikdən sonra evə qayıtmayıb. Onu axtaran qrup əvvəlcə meşə döşənəyində qadına məxsus bəzi əşyalar, daha sonra isə qarnı şişmiş iri ilan aşkarlayıb.
İlan öldürülərək yarıldıqda onun daxilində Caranın hələ bütövlüyünü qoruyan meyiti aşkar edilib. İlanın torlu piton olduğu ehtimal edilir, çünki həmin ərazidə yetkin insanı tutub yeyə biləcək qədər böyük olan yeganə növ məhz budur.
İndoneziya Herpetofauna Fondunun direktoru və ilanların mühafizəsi üzrə mütəxəssis Natan Ruslin bildirib:
“Onlar boğucu ilanlardır, buna görə də bədənlərini insanın ətrafına sarıyırlar. Sanki sizi ölümə qədər qucaqlayırlar. Siz nəfəs aldıqda bədəniniz sıxılır, ilan isə daha da bərk sarılır və nəfəs verə bilmirsiniz. İlanın yuxarı və aşağı çənələri bağlarla birləşib və kifayət qədər elastikdir. Buna görə də başından daha böyük ölçüdə olan ovu uda bilir.”
Təsirli ölçüləri və gözəl rəngləri səbəbindən torlu pitonlar ziyarətçilərin diqqətini cəlb etmək məqsədilə zooparklarda da saxlanılır.
Dünyanın ən uzun ilanı kimi tanınmasına baxmayaraq, bu növün cırtdan formalarına Avstraliyanın şimal-qərbində yerləşən adalarda da rast gəlinir. Onlar əsirlikdə daha kiçik ölçüdə olmaq üçün yetişdirilir. Belə “supercırtdan” fərdlərin uzunluğu adətən 1,82-2,4 metr arasında olur.
Yaşayış mühitinin itirilməsi səbəbindən arealının bəzi ərazilərində nəsli təhlükə altında olan mavi zolaqlı ilan şərq zolaqlı ilanının zəhərsiz yarımnövüdür.
Bu, boz-mavi rəngli, uzun və nazik bədənə malik ilandır. Onun uzunluğu təxminən 2 metrə çatır, bəzi fərdlər isə bu göstəricini də keçir. İlanın qarın pulcuqları ağımtıl, üz hissəsindəki maskası isə ağ-qızılı rəngdədir.
Samir
