Gündəlik qida rasionuna düzgün meyvələri əlavə etməklə orqanizmi sərbəst radikalların yaratdığı zədələnmədən qorumağa kömək etmək mümkündür. Antioksidantlarla zəngin məhsulların müntəzəm qəbulunun bəzi xəstəliklərin riskinin azalması və sağlam yaşlanma ilə əlaqəli olduğu bildirilir.

HİT.az xəbər verir ki, bu barədə "Verywell Health" yazıb.

Antioksidantlar əsasən meyvə və tərəvəzlərdə olan, onların parlaq rənglərini formalaşdıran birləşmələrdir. Bu maddələr orqanizmdə hüceyrələrə zərər verə bilən sərbəst radikallarla mübarizədə mühüm rol oynayır.

Mütəxəssislərin diqqət çəkdiyi 6 meyvə və giləmeyvə bunlardır:

1. Tünd rəngli üzüm

Xüsusilə Konkord və bənövşəyi üzüm növləri antioksidantlarla zəngindir. Bu maddələrin böyük hissəsi bənövşəyi üzümdə qabıqda toplanır. Üzümü çərəz kimi yemək, salatlara, smuzilərə və yulaf sıyığına əlavə etmək mümkündür.

2. Nar

Narın dənələri və lətində antosianinlər və taninlər kimi antioksidant birləşmələr var. Bu maddələr ürək-damar sistemi, böyrəklər və ümumi sağlamlığın qorunmasına töhfə verə bilər.

3. Zoğal

Zoğal yüksək antioksidant tərkibi ilə seçilir. Onun tərkibindəki faydalı maddələrin iltihab və ürək-damar sağlamlığı ilə bağlı proseslərə müsbət təsir göstərə biləcəyi qeyd olunur. Turş dada malik olduğundan onu daha şirin meyvələrlə birlikdə istehlak etmək mümkündür.

4. Qaragilə

Qaragilə də antioksidant baxımından zəngin meyvələr sırasındadır. Onun müntəzəm qəbulu sağlam qidalanmanın bir hissəsi kimi ürək-damar sistemi, qan təzyiqi, xolesterin və görmə ilə bağlı sağlamlığın dəstəklənməsinə kömək edə bilər.

5. Böyürtkən və moruq

Bu giləmeyvələr də çoxsaylı antioksidant birləşmələr ehtiva edir. Onların ürək-damar sağlamlığının və həzm sisteminin dəstəklənməsində, həmçinin iltihab proseslərinin azalmasında faydalı ola biləcəyi bildirilir.

6. Papayya

Tropik meyvə olan papayya antioksidantlarla yanaşı, müxtəlif vitaminlərlə də zəngindir. Onun tərkibindəki faydalı maddələr yaşlanma ilə bağlı dəyişikliklər, ürək-damar xəstəlikləri və yüksək xolesterin riskinin azaldılmasına kömək edə bilər.

Bununla belə, mütəxəssislər vurğulayırlar ki, yalnız antioksidantlarla zəngin meyvələr yemək sağlamlığın qorunması üçün kifayət deyil. Balanslaşdırılmış qidalanma, kifayət qədər yuxu, fiziki aktivlik və stressin idarə olunması da sağlam həyat tərzinin vacib hissələridir.

Samir