Səyahətçilərin bron edə bildiyi reyslər arasında "Singapore Airlines" aviaşirkətinin Nyu-York – Sinqapur marşrutu dünyanın ən uzun müntəzəm sərnişin reysi olaraq qalır. Uzunluğu 15,4 min kilometrdən çox olan bu uçuş orta hesabla 18 saat 40 dəqiqə davam edir.

HİT.az xəbər verir ki, bu yaxınlarda "Airbus" şirkətinə məxsus təyyarə Melburndan Tuluzaya 24 saat 24 dəqiqə ərzində fasiləsiz uçaraq 23 min kilometr məsafə qət edib. Lakin bu, sərnişin reysi deyil, sınaq uçuşu olub.

Ən uzun 10 müntəzəm birbaşa sərnişin marşrutu

1. Nyu-York – Sinqapur

* Aviaşirkət: "Singapore Airlines"
* Məsafə: 15,4 min km

Dünyanın ən uzun müntəzəm birbaşa sərnişin reysi Nyu-Yorkdakı JFK hava limanını Sinqapurun Çanqi hava limanı ilə birləşdirir. Küləyin istiqamətindən asılı olaraq uçuş təxminən 19 saat davam edə bilər.

2. Nyuark – Sinqapur

* Aviaşirkət: "Singapore Airlines"
* Məsafə: 15,3 min km

"Singapore Airlines" şirkətinin Nyuarkdan Sinqapura həyata keçirdiyi reys JFK-dan Sinqapura olan uçuşdan cəmi bir neçə kilometr qısadır.

3. Oklend – Doha

* Aviaşirkət: "Qatar Airways"
* Məsafə: 14,5 min km-dən bir qədər çox

Bu marşrut Yeni Zelandiyanı Qətərin paytaxtı Doha ilə birləşdirir və Okeaniya ilə Yaxın Şərq arasında ən uzun hava əlaqələrindən biridir.

4. London-Hitrou – Pert

* Aviaşirkət: "Qantas"
* Məsafə: 14,5 min km

Bu marşrut 2026-cı ildə Yaxın Şərqin hava məkanında yaranan problemlər fonunda müvəqqəti dəyişikliklərin təsir göstərəcəyi reyslər sırasındadır.

5. Dallas – Melburn

* Aviaşirkət: "Qantas"
* Məsafə: 14,4 min km

Bu birbaşa reys ABŞ və Avstraliyanı birləşdirən ən uzun sərnişin marşrutlarından biridir.

6. Paris Şarl de Qoll – Pert

* Aviaşirkət: "Qantas"
* Məsafə: 14,2 min km-dən bir qədər çox

7. Oklend – Nyu-York (JFK)

* Aviaşirkətlər: "Air New Zealand" və "Qantas"
* Məsafə: 14,2 min km

"Air New Zealand" 2022-ci ildə Nyu-Yorka birbaşa reyslərə başlayıb. Təxminən bir il sonra "Qantas" da bu marşruta qoşulub. Bundan əvvəl iki şəhər arasında səyahət edən sərnişinlər ən azı bir dəfə, adətən ABŞ və ya Asiyada transfer etməli olurdular.

8. Oklend – Dubay

* Aviaşirkət: "Emirates"
* Məsafə: 14,1 min km-dən bir qədər çox

Bu marşrut A380 təyyarələri ilə həyata keçirilən dünyanın ən uzun müntəzəm reyslərindən biridir. Oklend – Nyu-York marşrutundan fərqli olaraq, bu uçuş Sakit okeanı deyil, Hind okeanını keçərək qərbə doğru hərəkət edir və Yeni Zelandiya ilə Yaxın Şərqi birbaşa birləşdirir.

9. Mexiko – Şençjen

* Aviaşirkət: "China Southern Airlines"
* Məsafə: 14,1 min km

Bu marşrut Sakit okeanı keçərək Mexiko şəhərini Çinin cənubundakı Şençjen şəhəri ilə birləşdirir. 11 may 2024-cü ildə istifadəyə verilən marşrut üzrə həftədə üç dəfə gediş-dönüş reysi "Airbus A350" təyyarələri ilə həyata keçirilir.

10. Los-Anceles – Sinqapur

* Aviaşirkət: "Singapore Airlines"
* Məsafə: 14,1 min km

Siyahını "Singapore Airlines" şirkətinin Los-Ancelesdən Sinqapura həyata keçirdiyi birbaşa reys tamamlayır. Uçuş təxminən 17 saat 40 dəqiqə davam edir.

Bu marşrutlar müasir aviasiyanın imkanlarının nə qədər genişləndiyini göstərir. Sərnişinlər artıq bir neçə qitəni keçən və 15 min kilometrə yaxın məsafəni fasiləsiz qət edən uçuşları adi qaydada bron edə bilirlər.

Samir