Polşanın baş naziri Donald Tusk Nüvə Paylaşımı proqramı çərçivəsində ABŞ-ın nüvə silahlarını ölkədə yerləşdirməyə hazır olması barədə sözlərindən sonra prezident Anjey Dudanı tənqid edib. 

HİT.az xəbər verir ki, bu barədə TASS məlumat yayıb.

"Mən istərdim ki, təhlükəsizliklə bağlı bütün mümkün təşəbbüslər ilk növbədə buna cavabdeh olan insanlar tərəfindən çox diqqətlə hazırlansın və hər kəs buna ehtiyacımız olduğuna əmin olsun", deyə Tusk bildirib.

Onun sözlərinə görə, nüvə silahının yerləşdirilməsi ideyası çox genişmiqyaslı və ciddidir və bununla bağlı o, dövlət başçısını belə bəyanatla çıxış etməyə vadar edən motivlərlə maraqlanıb.

Bundan əvvəl Anjey Duda Varşavanın ABŞ-ın nüvə silahlarını öz ərazisində yerləşdirməyə hazır olduğunu bildirib.

"Əgər müttəfiqlərimiz NATO-nun şərq cinahının təhlükəsizliyini gücləndirmək üçün Nüvə Paylaşımı çərçivəsində bizim ərazimizdə də nüvə silahı yerləşdirmək qərarına gəlsələr, biz buna hazırıq", deyə Duda bildirib.

Nüvə Paylaşımı ABŞ və Şimali Atlantika Alyansının bir neçə ölkəsi arasında birgə proqramdır və lazım gəldikdə nüvə silahlarının Amerika anbar bazalarından alyans üzvlərinin ərazisinə köçürülməsinə imkan verir. Eyni zamanda, yerləşdirməyə təkcə ABŞ prezidenti deyil, həm də Böyük Britaniyanın baş naziri, həmçinin NATO-nun nüvə planlaşdırma qrupu razılıq verməlidir.

Samir