Psixoloqlar adi, ağrılı dərəcədə ehtiraslı münasibətləri əsl “sevgi asılılığından” fərqləndirən əsas xüsusiyyəti müəyyən ediblər. Əsas fərqləndirici amilin ümumi emosional qeyri-sabitlik deyil, narahat bağlılıq, ilk növbədə isə tərk edilmə ilə bağlı güclü qorxu olduğu məlum olub. 

HİT.az xəbər verir ki, araşdırma “Sexual Health & Compulsivity” (SH&C) jurnalında dərc edilib.

Patrisiya Velottinin rəhbərlik etdiyi Roma Sapienza Universitetinin alimləri orta yaş həddi 33 olan 152 yetkin italiyalını müayinə ediblər. İştirakçılar üç qrupa bölünüb: problemin əlamətləri olmayan 70 nəfər, “risk zonasında” olan 53 nəfər və asılılığın klinik formasına malik 29 nəfər.

Məlum olub ki, emosiyaların tənzimlənməsində çətinliklər və özünəqiymətləndirmə ilə bağlı problemlər həm risk qrupunda, həm də klinik qrupda oxşar olub. Yəni bu xüsusiyyətlərin özü “güclü aşiq olma” ilə xəstəlik arasındakı fərqi müəyyən etmir.

Narahat bağlılığın səviyyəsi isə mərhələli şəkildə artıb: problemin olmadığı insanlarda minimal, risk zonasında orta, klinik qrupda isə ən yüksək göstərici qeydə alınıb. Tədqiqat müəlliflərinin sözlərinə görə, məhz tərk edilmək qorxusu vəziyyətin klinik baxımdan əhəmiyyətli mərhələyə keçidini göstərir.

Bu sərhədin anlaşılması praktik baxımdan əhəmiyyətlidir. Bu, ağrılı olsa da, ümumilikdə normal aşiqolma təcrübəsini mütəxəssis yardımına ehtiyac yaradan vəziyyətdən fərqləndirməyə kömək edir. Bununla belə, tədqiqatda iştirak edənlərin sayı azdır və araşdırma yalnız bir ölkədə aparılıb. Buna görə nəticələrin daha böyük və müxtəlif qruplar üzərində yoxlanılmasına ehtiyac var.

Buna baxmayaraq, araşdırma konkret bir meyar ortaya qoyur: diqqəti emosiyaların şiddətindən daha çox partnyoru itirmək qorxusunun insanın bütün həyatını əhatə edəcək dərəcədə güclü olmasına yönəltmək lazımdır.

“Sevgi asılılığı” anlayışı hələlik xəstəliklərin rəsmi təsnifatlarına daxil edilməyib, lakin mexanizmlərinə görə davranış asılılığının digər formaları ilə yaxınlaşdırılır. Güclü, hətta ağrılı aşiqolma hissini insanın həyatını dağıdan vəziyyətdən ayırmaq indiyədək çətin olub. Müəyyən edilən marker – partnyoru itirmək qorxusunun həddindən artıq güclü olması – insanın həqiqətən mütəxəssis yardımına ehtiyac duyduğu halları müəyyənləşdirmək üçün daha konkret istiqamət verir.

Samir