Bir çox səyahətçi hələ də bilmir ki, bəzi qida məhsullarını təyyarəyə götürmək və ya Avropa ölkələrinə daxil etmək qadağan oluna bilər.
HİT.az “Express”ə istinadən xəbər verir ki, “easyJet”, “Ryanair”, “Jet2” və “TUI” kimi aviaşirkətlər sərnişinlərin öz qəlyanaltılarını gətirməsinə icazə versə də, bəzi məhsul və içkilərə məhdudiyyətlər qalır. Bu qaydalar həm aviaşirkətdən, həm də təyinat ölkəsinin tələblərindən asılıdır.
“TUI” şirkətinin uzunməsafəli, 7 saatdan artıq reyslərində yemək və içkilər biletdə daxil olur. Daha qısa uçuşlarda isə qida və içkiləri təyyarənin bort xidmətindən almaq mümkündür. Ümumilikdə sərnişinlərə öz yeməklərini gətirməyə icazə verilir, lakin ekipaj evdən gətirilən məhsulları qızdırmaq və ya soyutmaq öhdəliyi daşımır. Yalnız uşaq qidaları üçün istisna tətbiq olunur. Həmçinin sərnişinlərə uçuş zamanı öz spirtli içkilərini qəbul etmək qadağandır.
“easyJet” sərnişinlərinə təyyarəyə yemək gətirməyə icazə verir. Lakin maye və ya yarım-maye məhsullar — şorba, yoqurt, krem və souslar — hava limanı təhlükəsizlik qaydalarına uyğun məhdudiyyətlərə tabedir. İsti içkiləri isə yalnız təhlükəsizlik yoxlamasından sonra, qapaqlı qabda almaq şərti ilə təyyarəyə götürmək olar. Şirkət həmçinin bildirir ki, hər ölkənin ayrıca idxal qaydaları ola bilər və sərnişinlər bunları əvvəlcədən yoxlamalıdır.
“Ryanair” sərnişinlərinə öz yeməklərini və alkoqolsuz içkiləri təyyarəyə götürməyə icazə verir. Lakin isti içkilərlə boardingə keçmək qadağandır. Bundan əlavə, uçuş zamanı öz spirtli içkilərini, o cümlədən duty free məhsullarını istifadə etmək qəti şəkildə qadağandır. Sərnişinlər yalnız bortda alınan spirtli içkiləri qəbul edə bilərlər.
“Jet2” isə yemək və içkilərlə bağlı ən sərt qaydalara malik aviaşirkətlərdən biridir. Şirkət təhlükəsizlik səbəbindən isti yemək və isti içkilərin gətirilməsini qadağan edir. Eyni zamanda güclü qoxu yarada biləcək qidaların daşınması da məhdudlaşdırıla bilər. Bununla belə, sərnişinlər soyuq qəlyanaltılar və hazır soyuq yeməkləri gətirə bilərlər. Uçuş zamanı isə bort xidmətindən yemək və içki almaq mümkündür.
Səyahətçilərə həmçinin xatırladılır ki, aviaşirkət qaydaları ilə ölkəyə giriş zamanı tətbiq edilən gömrük məhdudiyyətləri fərqli anlayışlardır.
Avropa İttifaqı ölkələrinə səyahət zamanı bir çox ət və süd məhsullarının gətirilməsinə məhdudiyyətlər davam edir.
Xüsusilə aşağıdakı məhsullarda problem yarana bilər: vetçinalı sendviçlər, pendirli sendviçlər, kolbasa, yoqurt və digər süd məhsulları.
Aİ bu qaydaları heyvan xəstəliklərinin yayılmasının qarşısını almaq məqsədilə tətbiq edir.
Oxşar məhdudiyyətlər Böyük Britaniyada da Aİ ölkələrindən gətirilən bəzi ət və süd məhsullarına şamil olunur.
Qaydalar epidemioloji vəziyyətə görə dəyişə bildiyi üçün turistlərə səyahətdən əvvəl aktual tələbləri yoxlamaq tövsiyə edilir.
Samir
