Mütəmadi fiziki aktivlik, hətta irsi meyilliliyi olan insanlarda belə ciddi ürək ağırlaşmalarının riskini əhəmiyyətli dərəcədə azalda bilər. Bu qənaətə ABŞ alimləri gəlib. 

HİT.az xəbər verir ki, araşdırmanın nəticələri “American Journal of Preventive Cardiology (AJPC)” jurnalında dərc olunub.

Tədqiqat kardiomiopatiya — ürək əzələsinin tədricən zəifləyərək qanın nasoslanmasını çətinləşdirdiyi xəstəliklər qrupu — üzərində aparılıb. Bu vəziyyət ürək çatışmazlığı, ritm pozuntuları və qəfil ürək ölümü kimi halların əsas səbəblərindən biri hesab olunur. Xüsusilə müəyyən irsi gen variantlarına sahib olan şəxslərdə xəstəliyin inkişaf riski daha yüksək olur.

Tədqiqatçılar böyükmiqyaslı uzunmüddətli layihədə iştirak edən 15 mindən çox insanın məlumatlarını təhlil ediblər. Əvvəlki araşdırmalardan fərqli olaraq, fiziki aktivlik səviyyəsi sorğularla deyil, hərəkəti obyektiv şəkildə qeydə alan daşına bilən cihazlar vasitəsilə ölçülüb. İştirakçılardan 831 nəfərdə kardiomiopatiya ilə əlaqəli yüksək riskli genetik variantlar aşkar edilib.

Məlum olub ki, irsi risk daşıyan və tövsiyə edilən fiziki aktivlik səviyyəsindən az hərəkət edən şəxslərdə ürək-damar fəsadları daha tez-tez baş verib. Lakin eyni genetik riskə malik olub mütəmadi şəkildə idman edən insanlarda mənfi nəticələrin ehtimalı, riskli gen daşımayan, lakin hərəkətsiz həyat tərzi keçirən şəxslərlə oxşar səviyyədə olub.

Mövcud tövsiyələrə əsasən, böyüklər həftədə ən azı 150 dəqiqə orta intensivlikli və ya 75 dəqiqə yüksək intensivlikli fiziki aktivliklə məşğul olmalıdırlar. Orta intensivlikli fəaliyyətlərə sürətli gəzinti, velosiped sürmə, bağçılıq və aktiv yoqa, yüksək intensivlikli fəaliyyətlərə isə qaçış, üzgüçülük, aerobika və digər yüksək enerji tələb edən idman növləri daxildir.

Samir