Azərbaycanda aqrar sahədə inqilabi addım: Yeni beynəlxalq universitet yaradılır.
Azərbaycan Respublikasının Prezidenti İlham Əliyevin təsdiq etdiyi “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı” ölkənin aqrar sektorunda yeni bir dövrün əsasını qoyur. Proqram çərçivəsində reallaşdırılacaq ən diqqətçəkən layihələrdən biri də xarici tərəfdaşla birgə yaradılacaq yeni beynəlxalq aqrar universitetdir.
Məsələ ilə bağlı Oxu24.com-a açıqlama verən təhsil eksperti Şəmsi Qoca bildirib ki, bu ali təhsil müəssisəsinin qurulması ölkənin kənd təsərrüfatı və akvakultura sahələrində həm təhsilin keyfiyyətinə, həm də kadr hazırlığına köklü və real töhfələr verəcək.
Ekspert vurğulayıb ki, yeni yaradılacaq universitet fəaliyyətini tamamilə beynəlxalq kurikulum əsasında quracaq. Bu isə yerli tələbələrə xarici professor heyətindən dərs almaq və akademik mübadilə proqramlarında iştirak etmək imkanı yaradacaq:
“Tətbiq olunacaq ikili diplom proqramları sayəsində yerli mütəxəssislərimiz təkcə Azərbaycanda deyil, qlobal əmək bazarında da rəqabətədavamlı kadrlar kimi yetişəcəklər. Bu, milli təhsil sistemimizin beynəlxalq standartlara inteqrasiyası baxımından çox mühüm addımdır".
“Akvakultura və balıqçılıq sahəsində elmi boşluqlar dolacaq”
Şəmsi Qoca indiyədək kadr potensialı və elmi bazası nisbətən zəif olan sahələrə xüsusi diqqət çəkib. Onun sözlərinə görə, yeni ali məktəb Xəzər dənizi daxil olmaqla ölkənin su resurslarının səmərəli idarə edilməsi sahəsində müasir biliklərə malik mütəxəssislər formalaşdıracaq, akvakultura və balıqçılıq sektorundakı mövcud elmi boşluqları sürətlə aradan qaldıracaq.
Yeni universitet həm də kənd təsərrüfatının rəqəmsallaşdırılmasında aparıcı qüvvəyə çevriləcək. Ekspert qeyd edib ki, tədris prosesində aşağıdakı innovativ istiqamətlərə xüsusi önəm veriləcək:
-Rəqəmsal kənd təsərrüfatı sistemləri;
-Pilotsuz uçuş aparatlarının (PUA) aqrar sektorda tətbiqi;
-Avtomatlaşdırılmış modern suvarma texnologiyaları.
Bu innovasiyalar sayəsində Azərbaycanın kənd təsərrüfatı ənənəvi, ekstensiv üsullardan elmi əsaslı intensiv üsullara keçəcək.
Universitetin təklif edəcəyi ən böyük üstünlüklərdən biri də nəzəriyyə ilə təcrübənin birləşdirilməsidir. Tələbələr böyük aqroparklarda və müasir təsərrüfatlarda birbaşa istehsalat prosesində iştirak edərək real praktiki vərdişlərə yiyələnəcəklər. Bu isə sahəni idarə edə biləcək biznesyönümlü yeni nəsil aqro-menecerlərin yetişməsinə yol açacaq.
Təhsil eksperti Şəmsi Qoca sonda onu da əlavə edib ki, Dövlət Proqramından irəli gələn bu böyük təhsil layihəsi, bütövlükdə Azərbaycanın qida təhlükəsizliyini strateji səviyyədə təmin edəcək və ölkənin aqrar məhsullarının ixrac potensialını əhəmiyyətli dərəcədə gücləndirəcək.
